Bonbiní awe nochi na e tradishonal bríndis di gezaghèber pa habri aña 2024.
Komo gezaghèber mi ta kontento di mira asina tantu kara prosedente di diferente pais i isla.
E diferente nashonalidat presente ta tipifiká e kara kolorido i nos poblashon. Un sosiedat multi kultural kaminda tin rèspèt, komprenshon i toleransia pa otro. Aña pasá nos komunidat a sigui krese i yega un kantidat di 25.000 habitante.
Aña 2023 ku ta tras di lomba tabata un aña signifikante pa Boneiru. Komo promé mandatorio mi kier menshoná algun suseso ku a tuma lugá den 2023.
Den 2023 a skohe e miembronan di Konseho Insular pa e periodo di gobernashon di 2023 te ku 2027;
Den 2023 a parti diferente prosèsvèrbal i a kita un kantidat grandi di reibeweis pa manehá outo bou di influensia di alkohòl;
Den 2023 e isla a bira mas sushi prinsipalmente a lo largo di kareteranan sekundario;
Den 2023 a tuma lugá un manifestashon grandi pa logra oumento di sueldo mínimo, despues di un lucha ku a dura 13 aña;
Den 2023 frontera ku Venezuela a habri atrobe pa barku di fruta;
Den 2023 e kantidat di pasahero na nos aeropuerto a sigui krese;
Den 2023 a asfaltá mas kaya;
Den 2023 a yega na un dil ku Hulanda pa konstruí mas kas pagabel pa nos suidadanonan lokal;
Den 2023 mas hende lokal a tuma inisiativa pa kuminsá ku nan propio negoshi;
Den 2023 mas persona a inskribí pa un estudio na MBO;
Den 2023 e ramonan di deporte a oumentá. Ehèmpel di esaki ta e deporte di Hockey;
Den 2023 preisnan a sigui subi;
Den 2023 a kumpra plantashi Fontein bèk.
Un aña 2023 kargá ku aktividat positivo i ménos positivo.
Pa loke ta aña 2024 mi mensahe ta lo siguiente:
Famia mester keda e núkleo sentral di nos sosiedat kaminda ta eduká, stima, koregí i krea suidadanonan ehemplar kaminda ta tene debido kuenta ku esnan enfermo, nos grandinan i esnan ku un forma di limitashon.
Tatanan i mamanan mester demonstrá na tur momento nan outoridat i koregí komportashon no deseá i stimulá rèspèt. Tur suidadano mester haña oportunidat pa desaroyá su talentonan pa asina e por aportá na un komunidat harmonioso.
Siña i instruí kada miembro di famia, besiña i bishitante pa tene nos isla limpi i bunita. No hasi manera ta sosodé awor akí kaminda ku ta kometiendo un atentado kontra nos ekosistema. Sushi na tur momento i okashon mester ser depositá den baki di sushi of na e sitionan destina pa tira sushi. Benta sushi den kurá di kas, pafó di kura di kas , kantu di kaminda òf den buraku di greis ta un krímen kontra nos naturalesa i ekosistema.
Ban yuda otro progresá i no kai den negativismo. Negativismo ta un blòki di chumbu ku lo stroba nos di bai dilanti. Ban deskargá e mente i pensamentunan negativo ku ta un estorbo i krea un klima positivo pa un desaroyo personal optimal.
Ku un mente habrí i positivo nos lo surpasá tur kontratiempo i krea un base sólido pa futuro. Ku un mente habrí i aktititut positivo nos por atendé ku mas firmesa tur reto ku ta nos dilanti.
Stòp di pensa chikí i ban krea kadenanan komersial fuerte pa krea un ekonomia sostenibel.
I no lubidá ku Naturalesa, Kultura, Trankilidat i Seguridat mester keda nos pilarnan ekonómiko sólido.
Na henter pueblo un felis aña 2024 kaminda mester tin progreso pa un i tur. I esey ta posibel si un i tur uni forsa i keda positivo. Un bon aña.