Nos komo sosiedat Boneriano por kompremete nos mes na e kompromiso personal aki? Ku un obhetivo fundamental komparti ku ta uni nos tur komo Boneriano, residente, gruponan, organisashonan, gubernamental I no-gubernamental – pa kontinua I segura nos proseso di desaroyo. Laga nos kontribui na e empoderashon I demokratisashon di e pueblo Boneriano, poniendo e siguiente bloki I paso di progreso na e fundeshi establese pa nos antepasadonan ku nan sodo, sanger I lagrima ku nan a lucha pa nos pa nos por ta aki awe.
Na momento ku nos ta embarka riba e anja nobo aki, un komienso nobo, laga nos uni nos forsanan pa konstrui nos Boneiru i hasi nos esfuerzo pa logra bienestar I felisidat pa nos mes, nos yunan, I futuro generashonan. Esaki ta mi kompromiso komo lider I e proposito ku ta guia ami na e momento kritiko I krusada aki – un eskoho ku ami ta asepta komo un responsabilidat sagrado.
Ami ta rekonose ku Boneiru ta pertenese na nos yunan I nos desedientenan I ta nos deber pa kuida esaki I proteha esaki, meskos ku nos antepasadonan a hasi pa nos. Nos mester rekonose ku nos destino I futuro ta den sinta den nos mes man I ku nos mester tuma inisiativa, meskos ku nos ta hasi kada dia ora nos lanta pa lucha pa nos mes I nos famia. Nos mester spera e mesun kompromiso aki di tur nos lidernan I gobierno.
Na e krusada aki, no tin otro alternativa pa nos bini huntu I uni komo un pueblo, un nashon I un destino I enfrenta e tarea I reto monumental aki huntu. Nos mester ta dispuesto pa pone un banda I laga atras tur diferensianan, politiko, religioso, sosial I di otro tipo – pa logra un meta komun. Nos mester tuma e responsabilidat pa promove I sostene un kambio fundamental ku por uni nos komo pueblo Boneriano, den un proseso di desaroyo ku mester wordu emansipa I demokratisa. Huntu, nos por kontinua konstrui nos Boneiru ku prosperidat I felisidat pa nos mes, nos yunan I futuro generashonan.
Komo mama, tata, ruman, amigu, lider, suidadano I Boneriano, ta nos deber pa determina nos propio destino I nada no por destrai I stroba nos den nos desishon I akshonan pa uni I logra esaki.
Nos ta prepara pa brasa e trajekto aki?
Deseando kada suidadano di Boneiru sin ningun deskriminashon di kolo, religion o genero un Feliz i Prospero Anja Nobo.
