Esey ta un palabra cu nos ta uza hopi na cambio di aña. Pa mi for di prome di augustus
2024 un bida nobo a cuminsa, caminda mi a asumi e caro y responsabilidad di
gezaghebber. 5 luna cu a trece cantidad di momentonan di decision y actuacion rapido y
diligente di mi como gezaghebber.
Mi ta gradici boso tur un biaha mas pa e sosten y
caminda ta necesario critica constructivo cu mi a ricibi. Esaki tabata un empuhe pa mi
crecemento den e funcion aki. Danki di curason pa esaki!
Den e periodo cortico aki tin algun cos cu a resalta y ta necesario pa para keto na esaki.
Boneiro a desaroya positivamente den e ultimo añanan cu a pasa.
Nos tin un porcentahe hopi abou di personanan sin trabou y un grado di participacion halto den e sector laboral. Pues nos ta un pueblo trahado! Tur desaroyo ta trece retonan cu né. Nos no por desaroya kedando cu tur cos manera nan tabata antes. Ta parce hopi biaha cu antes tur cos tabata miho pero esey no necesariamente ta berdad. Mi suegro di 85 aña a conta mi cu e la lanta como mucha tende cos ta malo na Boneiro y e tabata puntra su mes ta ki dia cos ta drecha?
Desaroyo economico mes ta bay man den man cu desaroyo di e hende. Pa esaki tambe
tin hopi esfuerso a y ta ser haci pa duna un contribucion na esaki. Sosten y preparacion
pa lanta y mantene negoshi (KvK Akademia), educacion pa adulto via Forma, MBO ta
ofreciendo mucha mas posibilidad pa studia y desaroya na Boneiro etc. Manera mi a indica
den mi discurso di fin di aña e responsabilidad propio y outo disciplina ta elementonan
importante cu nos tin cu sigui traha riba dje pa trece prosperidad pa nos mes y nos yiunan.
Nos tin tur ingrediente pa sigui crece y desaroya como pueblo Boneriano. Nos tur tin cu
duna nos granito pa nos por crea e comunidad cu nos kier tin. No laga nos simplemente
desea otro bon aña pero puntra nos mes seriamente kico mi por haci pa haci e aña di e
otro un miho aña. Tin biaha ta simplemente hasié un custumber di duna un hende un
compliment pa un cos bon cu e la haci. Pa abo e no ta costa nada pero pa e otro e por ta
net e sosten cu e mester pa sigui desaroya su potencial cu e tin y sigui crece den locual cu
e ta haci.
Palabra ta conta! Ban ta consciente con nos ta expresa nos mes pa nos por tene otro
responsabel pero cu e solo meta pa nos tur bira miho di esaki. Mi ta uni mi mes pa no ta
dividi riba e pida baranca aki. Pa nos uni mas y bira un comunidad multi cultural, tur cu ta
biba aki mester haci nan maximo esfuerso pa acerca e otro cu respet y cu gana di siña di
e otro.
Nos ta un isla inclusivo y esey pa mi ta nifica cu nos tur ta traha riba e exclusividad
aki. Papia cu otro, respetando otro su cultura, lenga y identidad. Cu e base aki nos por sigui
pa dilanti i bira un pueblo economicamente fuerte, pero mas importante socialmente
Fuerte y uni.
Mi ta gradici tur cu a contribui na nos isla den 2024, nos trahadonan den tur sector entre
otro di cuido, enseñansa y cuido pa mucha, riba tereno di siguridad nos polisnan,
bomberonan, Kmar, nos ambtenaarnan, trahadonan den construccion etc. Mi ta spera di
sigui conta cu e entusiasmo y tin biaha con duro e por parce dal bay cu e bon trabou!
Nos a demostra, basa riba estudio haci dor di CBS, cu nos tin un grado di felicidad halto
riba e isla aki. Esey ta cuadra cu e filosofia cu felicidad no ta un stacion cu bo ta yega of ta
simplemente un cos, pero felicidad ta un mentalidad.
Den 2025 boso por conta cu mi y ami ta conta cu bosonan.
Mi ta pidi tur hende pa hisa su kelki pa desea otro un feliz aña y hopi salud