Sint Maarten lo risibí e aña aki 24 mion florin antiano (ANG) ainda, kual ta 11,3 mion euro, na sosten finansiero di Hulanda. Konseho di Minister di Reino a disidí esei awe. Gobièrnu di Sint Maarten por paga kuentanan koriente ku e plaka.
E suma di sosten di likides ta konsistí di un sosten di 14 mion ANG den e di tres kuartal i 10 mion ANG pa e último tres luna di e aña akí.
E ayudo finansiero otorgá awor, ta parti di e palabrashonnan ku a hasi durante di e pandemia di corona. Hulanda e tempu ei a sali yuda e paisnan ku mas di un miar euro na préstamo sin interes, banda di tur tipo di ayudo médiko i sosten ku por ehèmpel pakete di kuminda pa medio di Krus Kòrá.
Tambe a palabrá ku e pais lo no mester kumpli ku e normanan presupuestario den 2020, 2021 i 2022. Eseinan ta bisa ku no tin mag di gasta mas ku loke ta drenta. Pa eventual buraku den e presupuesto ku surgi pa e motibu ei, bou di kondishon, e paisnan tabatin mag di pidi èkstra sosten den forma di préstamo sin interes. Sint Maarten ta hasi uso di esei awor pa tantu e di tres komo e di kuater kuartal di 2022.
Kòrsou i Aruba no a pidi sosten di likides. Awor ku segun espektativa e pandemia di corona a drenta den un fase nobo, i ku ekonomia di Aruba, Kòrsou i Sint Maarten ta lantando kabes atrobe, Konseho di Minister di Reino ta spera ku tur tres isla no tin mester di plaka èkstra di Hulanda.
