Suidadanonan Boneriano a vosifera nan preokupashon riba resiente desaroyonan despues di e konferensia na Baku, Azerbaijan, titula “E ruta di Boneiru desde Baku mediante Asamblea General di Nashonan Uni pa Outodeterminashon” , tene riba di 22 augustus 2024. E konferensia, ku a pone lus riba e violaoshonan severo di derecho humano ku Bonerianonan ta konfrontando desde ku e isla su restrukturashon na 2010, a wordu mira komo intimidashon dor di miembro di tweede kamer Hulandes, Sr Isa Kahraman.
Den un resiente publikashon, Sr Kahraman ta hasi varios pregunta na Minister di Relashonan Eksterior Veldkamp , buskando klaridat riba e prosedernan di e konferensia. Esaki sinembargo a wordu konfronta ku fuerte reakshon di parti di sosiedat sivil di Boneiru, ku den su bista e preguntanan ta komo un menasa direkto den nos lucha pa outodeterminashon i derechonan humano.
E pueblo Boneriano, ta sinti su mes profundamente molestia ku parlamentario Kahraman su preguntanan, aparentemente alimenta pa e media di propaganda politiko Hulanda-Karibense , e “Dossier Koninkrijksrelaties” ta aparenta pa ta un atento pa mina nos esfuersonan pasifiko pa outodeterminashon. E akshonan aki ta kreando e mesun instabilidat ku e ta kritika, ademas menasando nos komunidat su bienestar.
Finies ku ta un bosero kontinou pa derechonan humano i di outodeterminashon di Boneiru riba plataformanan internashonal, inkluyendo Nashonan Uni, ta enfatisa ku e derechonan di e bonerianonan pa outodeterminashon no ta negoshabel I mester wordu respeta pa e gobeirno Hulandes. Tambe ku e derechonan aki a wordu repitidamente viola desde ku e status di nos isla a wordu unilateralmente kambia na 2010, un moveshon ku hopi riba nos isla ta mira komo kontinuashon di opreshon kolonial.
E derecho di outodterminashon ta un derecho humano inalienabel ku ta pertenese na nos komo Boneriano, simplemente pasobra nos ta humano. E derechonan aki no ta suheta na influensia di kualke gobierno, Hulandes o Boneriano.
Finies tambe a prove e historia detaya di e lucha di Boneiru pa outodeterminashon, sitando varios eventonan klave kaminda e gobierno Hulandes a rekonose e isla su derechonan pero a faya di aktua di akuerdo ku ley internashonal. Esakian ta inklui un petishon di mas ku mas di 3500 firma di Bonerianonan, un petishon na Rei Willem Alexander, i na 2015 e referendum kaminda 66% di e elektorado a rechaza e aktual status konstitushonal.
Apesar di e obvio boluntad demokratiko di e pueblo di Boneiru, Hulanda a kontinua imponiendo manehonan ku a resulta den displazamento I marginalisashon di nos poblashon nativo. “Nos a wordu redusi na un minoria riba nos mes isla, awor menos ku 32% di e populashon, I ku nos eksistensia komo pueblo ta na peliger”.
Medionan di komunikashon manera “Dossier Koninkrijksrelaties” ta wordu husa pa destabilisa e komunidat di Boneiru I tambe otro islanan ruman asina kreando divishon I kaos bao di e suidadanonan Antiano.
Konkluyendo nos ta urgi e ofisialnan Hulandes inkluyendo Miembro di Parlamento Sr Kahraman, pa respeta derechonan di Boneiru I pa rekonose ku e suidadonan di Boneiru komo igual, meresiendo e mesun derechonan ku e suidadonan di Hulanda ta gosa di dje. Nos ta apela riba un resolushon pasifiko ku ta honra ley internashonal I e derecho di nos isla Boneiru pa wordu pone bek riba lista di Teritorionan-Sin-Propio-Gobernashon di Nashonan Uni.
Esaki no ta trata solamente di Boneiru, pero ta konserni pa respeta I defende derechonan humano ku nos tur tin. Nos ta hasi un yamada riba e gobiernu Hulandes pa hasi historia I finalmente resolve I termina e debate ku a kuminsa na 1796,”kon, di ki manera por konsidera tur ser humano igual”
