Den 2022 hopi cliente a informa Departamento di Agricultura, Cria y Pesca (DLVV) cu nan Sorsaca no ta pari of e flornan ta cay. Enbista cu e temporada di secura ta anunciando y e floracion di e Sorsaca ta catalysa p’esey DLVV kier ta precabido y di adilanti avisa cu awor ta e momento pa pensa ariba e cosechamento aki seis luna di e mata. Un mata hinca den tera na 3 te 5 m di distancia ta ofrece amplio espacio pa e crece. Ta recomendabel pa dos siman despues di e ultimo awacero, kisas Februari, pa laga e mata experiencia e secura cu por ta e señal pa e cuminsa floria. E recomendacion aki ta exigi supervision di e doño pa interveni si toch ta mustra cu e mata ta haya hopi molester di e falta di humedad. Por lo general e recomendacion di muha un mata ta 5 gallon di awa pa siman pa mantencion anto algo mas pa produccion. Kisas cuminsa cu dos gallon menos y mira con e mata ta reaciona. Atrobe ta mas recomendabel muha tur e awa manera cu solo lanta, di un solo biaha cu tiki henter e siman pasobra e ta pone e mata bira activo den tene awa. Mescos ta recomendabel pa muha e mata na e dripline. Cu ta un liña imaginario cu ta core na e perimetro di e sombra di e mata cu ta cay pareu cu e troncon. Den caso cu e sombra ta cay pega cu di otro mata por scoge tambe e perimetro dilanti di e rij di mata. E idea su tras ta cu te eybounan e raisnan cabey ta yega. Esakinan ta diferente cu esunnan na e troncon cu ta mas bien raisnan grandi cu ta tene e palo ariba. E raisnan cabey ta esunnan cu primeramente ta absorbe humedad y nutrientenan. Aki tambe ta e lugar unda cu por fertilisa e mata incorporando materia organico un pia hundo y hancho. Si e substrato ta Klip den cua no por coba un pia hundo, anto e ora un pia halto pero tapa cu foyo seco pa evita cu solo ta kima e y evapora tur su nutrientenan. Bisa un 5 kilo rond di e dianan aki anto cu San Juan atrobe. Eynan tambe por aumenta e materia organico di e suelo cu ta bon pa e bida microbial. Por aplica fertilisante na lugar di gordura di mest pero pa palonan di fruta e no ta un necesidad si aplica gordura.
Si muha e mata pega cu e troncon tin mas chance cu esaki ta benta spoornan di beschim ariba e troncon y infecta e mata. Spoornan di por ehempel Antracnosis, un malesa cu por kita Sorsaca di floria y pari ta. E ta presenta durante tempo di floracion na e momento cu e mata ta den hopi stress y no tin energia pa combati’e. E por haci cu tanto fruta jong como blachi ta seca y por cai. Na fruta maduro ta haña mancha putri net abou di e casca di e fruta. E manchanan aki ta bisto for di afo. Cu tempo sporonan di e fungus ta sali den centro di e mancha. Un otro manera di evita Antracnosis ta snoei pa solo por drenta y biento por pasa. Ora di snoei hende mester percura pa e sker ta bon skerpi anto ta kita rama te ariba e siguiente rama. Sinembargo si mester constata Antracnosis anto e ora e remedi ta usa quimico. Semper ta bon si pa piki tur fruta contamina y deshaci di nan. Den caso cu e Musca di Sorsaca por a coba den e fruta un otro tipo di Antracnosis por aparece den e fruta. Esaki ta keda chikito y ta haña mancha rondo chikito y despues e fruta ta bira preto. E Musca di Sorsaca hende por evita door di mara un saco di papel rond di e fruta ora esaki ta tres siman di hecha. Igual e practica por yuda tambe pa e Musca di Fruta di Mediterraneo. Pa ambos ta conta tambe cu mester piki tur fruta cu cay di e mata y duna bestia di come. Si no tin bestia e ora manera ta maranan den un saco di plastic cu prome a revisa si e tin buraco cu ta laga aire pasa, anto lage para den solo un dia henter pa siguiente dia composta den suelo. Frutanan ta hala rosea y den solo debi na e temperatura mas ainda pero si nan rosea ta corta pa un saco di plastic nan ta soda muri y hoga e bichinan di musca paden di nan. Por ultimo e flornan di Sorsaca ta hermafrodita (macho y hembra alavez) y ta polinisa di cruze hasta cu tin un practica di cruza e flornan na man. Esta coy e pollen (henter e flor tambe por) di un mata y frega esaki ariba e stamina di e flor di un otro mata. Pa mas informacion interesadonan por yama DLVV por medio di number di telefoon 5858102 of email na info@santarosa.aw.
1 comment
[…] Source link […]