Solangel Dinmohamed Lacle, ex candidato di partido MAS den un conferencia di prensa a splica loke cu a sosode cu ne den partido MAS. Esaki relaciona cu e hecho cu e no a drenta Parlamento, manera e palabracion interno tabata.
E reacción aki ta bini casi un luna despues di eleccion parlamentario di dia 25 di juni ultimo.
Den e conferencia el a bisa cu awe ta e dia cu el a dicidi di kibra e silencio, basa riba transparencia y integridad. El a papia di e protocol firma di dia 6 di mei, Protocol den democracia parlamentario, cu dirigencia no a cumpli cu ne.
Dia seis di mei tabatin e prome partijraad unda líder di MAS a puntra pa firma un Protocol unda cu esnan cu tin mas voto ta e prome yama pa drenta Parlamento. Den e reunión a papia cu number no ta importante. Tur a priminti di cumpli cu e protocol, a pesar cu tin un kiesverordening cu ta riba e Protocol. A firma cu confiansa basa loke líder di partido a bisa di ta integro y su experiencia di 23 aña.
E ex candidato di MAS a bisa cu e ta consciente cu e no a saca su mes cu voto preferencial, pero e tin 2.5% mas voto cu candidato no. 2 y cinco bes mas cu candidato nor. 3 riba lista di partido MAS.
Lacle a recorda líder di partido MAS cu sin e 100 y pico votonan di su persona, partido MAS lo no a haya e restzetel cu nan a logra. A pesar di esaki, dirigencia di MAS a dicidi pa no honra e Protocol cu 5 di e seis candidatonan a firma.
Den e Protocol tambe a duna un poder irrevocabel na directiva di MAS. Pues directiva tabatin e poder pa bay Conseho Electoral y splica kico ta e palabracion interno. Ta spera cu nos legisladornan ta husto pa cu pueblo pa cual ta exigi tambe cu nan ta husto pa adapta leynan anticua, cu no ta cuadra cu e democracia cu ta bibando.
Aunke cu no a respeta e Protocol awo, for di seis di mei te cu 25 di juni, tur candidato a uza e Protocol firma como un herment di campaña. Asina el a ilustra declaracionnan di tanto Marisol Lopez Tromp como di sra Aquanette Gunn unda ta menciona e Protocol firma bou di e candidatonan. Hasta a critica e kiesverordening. “Tur loke mi ta bisando, mi ta cu pruebanan. Ta palabranan di sra. Lopez Tromp y Gunn. Awe nos ta wak cu nan no ta respeta nan. Mi nunca lo por a pensa cu líder di partido of otro candiadto lo no honra e protocol aki. Si nan no respeta esaki, nan ta cometiendo kiezersbedrog. A gaña y manipula pueblo pa gana voto.”
Despues di e resultado di votonan individual, según Solangel Dinmohamed Lacle, el a trata di haya contacto cu líder di partido 22 biaha, sin ricibi ningún reacción. Despues di tres dia di mensahe, el a haya un reacción di Lopez Tromp cu e ta hopi ocupa cu asuntonan político, cu tur cos lo cana según kiesverordening, y ta keda na cada candidato si nan ta honra e protocol of no.
Despues el a tuma contacto cu Aquanette Gunn, kende a informe cu “ami lo sigui e “kiesverordening” y lo haci loke cu líder di partido bisa mi haci. Esaki tabata un hemchi di awa friu pa mi. Pero el a duna mi un indicación di kico por spera di sra. Gunn den Parlamento.”
El a bisa cu durante henter e campaña político el a wordo uza y gaña door di sra. Marisol Lopez Tromp y sra. Gunn. “Nos tur a wordo uza y gaña. Nan tur a campaña cu e mesun protocol, pero awe ta haci manera cu e protocol no ta existi mas.”
Tambe el a reacciona riba e video di sra. Gunn, kende ta difama su persona, e ex candidata di MAS a bisa. Tin palabracion interno cu niun di nan por publica sin autorización di directiva. Pa e motibo aki e ta bisa, e video publica riba Facebook mester tin aprobación di e directiva. E video a bolter pasobra a causa cu partido MAS no ta forma parti di Gobierno. El a demostra e falta di liderazgo den partido MAS.
Contenido di e video, el a desmentí por completo. Tur loke e ta bisa eyden, ta contrario na e bunita palabranan cu e tabatin durante campaña. Gunn a mes a bisa den pasado c uta inhusto y un falta di respet cu un persona di menos voto ta drenta Parlamento. Banda di esaki, el a bisa, cu a cana cas pa cas pa busca voto. El a bisa cu e tin mensahe di palabranan di elogio cu el a ricibi door di partido y cu e ta esun cu mas duro ta traha.
El a splica cu el a uza un app den cual ta indica tur e adres specificonan cu el a bishita. Tur biaha cu nan a hala su atencion, e situacion a wordo splica y acepta cu e no ta haciendo nada malo. A bishita 624 cas y tabatin solamente un persona cu a puntra pa sra. Gunn pa cual el a manda e información concerni pa e candidato ey. Tur hende cu tabata puntra pa un candidato specifico, el a manda información pa e persona concerni.
El a repasa un pa un cada acusación di sra. Gunn contra dje y a desbarata di e acusacionnan. Semper e tabata un bon colega te ora cu e resultado individual a yega.
E no a reacciona prome, pasobra el a duna espacio pa sra. Marisol Lopez Tromp asumi su rol di líder, mirando cu e mes ta bisa di ta un persona integro. Despues di a cana e proceso di pidi aclaración, y no a haya reacción, el a dicidi di bay den un conferencia di prensa.
Marisol Lopez Tromp cu su 23 aña di experiencia a bin haci loke un persona cu dos luna di experiencia a haci. “Di e forma aki nos por mira kende realmente Marisol Lopez Tromp ta. E si sa kico ta un complot. Nan a traha un complot pa purba atacha mi prome cu nan a huramenta den Parlamento. Mi a hiba un campaña integro.”
El a papia di e reunion di dia 7 di juli cual tin como meta caba cu Solangel como político, e señora a trece dilanti den e conferencia di prensa. Lopez Tromp a permiti un hende sali den prensa pa difama un colega sin permiti un reacción.
Den e reunión di dia 7 di juli tabatin 16 persona presente, di cual mayoría e no a mira nunca. “Nan a forma un complot pa atachami,” Lacle a sigui splica. Den e reunión toxico, liderazgo a huzge pa no controla loke seguidonan tabata post riba Facebook. E ta sinti cu loke nan kier tabata pa silencia pueblo. A acuse di ta alia cu Otmar Oduber, loke el a desmentí.
Lider di partido MAS a menas’e, cu ainda e no los su pitbull pa cual e ta pone responsabel pa tur loke cu por pasa. E reunión a demostra cu e no por pertenece na un partido cu ta hiba e tipo di maneho aki. El a bisa cu ainda ta tempo pa nan drecha e situacion, y si esey sosode e lo no ta como titire político cu e líder por maneha. Kisas e líder di partido no ta cla pa un política nobo of tur loke nan ta papia di dje ta verdad. Despues a schors e reunión.
Den e di dos reunión, el a pidi claridad riba ki tipo di reunión, el a bin tende ta uno cu directica, cu en realidad mester ta yama cu cinco dia di anticipación. Y no 20 ora prome. Esey ta motibo cu e no a asisti na e reunión. Y dia 16 di juli a ricibi cu a retir’e como miembro y sin ningún prueba.
Na final el a bisa: No stop di kere den palabra, ni den política, ni acuerdonan firma. Locual no por kere ta den tipo di hendenan manera Marisol Lopez Tromp y Gunn, kendenan a demostra di no ta integro y di no por cumpli cu palabracionnan. “No lubida cu nan trabou den Parlamento ta sirbi nos y no lo contrario.”
