Willemstad – Pa entre otro optimalisá i trese mas efisiensia den e proseso di petishon pa ònderstant, Sektor di Desaroyo Sosial di Ministerio di SOAW a lansa un wèpsait nobo pa hasi petishon di ònderstant “online”. Tur persona ku ta deseá na hasi un petishon pa ònderstant, por hasi esaki entrante djabièrnè, 11 di desèmber, 2020, riba e wèpsait www.soaw.cw. Personanan ku a registrá na e number di WhatsApp 521-5028 pa ònderstant (ora e portal di ònderstant tabata será temporalmente) lo risibí instrukshon i informashon kon nan petishon lo keda prosesá.
Dikon un wèpsait nobo?
Relashoná ku e medidanan di prekoushon di COVID-19, Ministerio di SOAW a tuma akshon i adelantá e desaroyo di un portal “online” nobo pa ònderstant. Banda di optimalisá i trese mas efisiensia den e proseso di ònderstant, e wèpsait ta brinda tambe e posibilidat na kliente nobo pa hasi petishon pa ònderstant sin mester ta físikamente presente na Kas di Bario. Esaki ta yuda tambe ku e kliente no nesesariamente mester hasi su petishon durante oranan di ofisina di e kas di barionan, sino na e orario ku ta kumbiní e.
Ònderstant ta un di produktonan di mas grandi di Ministerio di SOAW. Na e momentonan aki, un kantidat di 8,195 persona ta risibí ònderstant. Ministerio di SOAW ta hasiendo su máksimo esfuerso pa redusí e tempu di espera, krea mas transparensia durante di e proseso di aplikashon i amplia komunikashon ku e kliente relashoná ku su petishon pa ònderstant. Esaki ta un paso mas pa bai pa un organisashon mas digitalisá i outomatisá posibel.
E proseso “online” di aplikashon pa ònderstant
Sektor di Desaroyo Sosial ke enfatisá ku aktualmente por apliká solamente pa ònderstant riba e wèpsait www.soaw.cw. Riba e wèpsait klientenan por mira un video kual ta splika kon e proseso di petishon pa ònderstant “online” ta kana. E wèpsait tambe tin informashon importante ku ta splika den mas detaye kiko e kondishonnan ta, pa bini na remarke pa ònderstant i e dokumentonan rekerí pa kompletá bo petishon. Tuma nota ku tur dokumento mester ta na òrdu promé ku bo petishon por keda tratá.
Informashon korekto
Tambe Ministerio di SOAW ta rekordá tur persona ku si bo duna informashon inkorekto òf bo retené informashon importante den bo petishon pa ònderstant i esaki wòrdu deskubrí, bo tin ku paga tur loke bo a kobra (di mas) bèk.
Sosten via HelpDesk SOAW
Personanan ku mester di asistensia pa yena nan petishon “online” via di e wèpsait nobo por tuma kontakto ku “Helpdesk” di SOAW na 724-5309 pa traha un sita i na e numbernan WhatsApp +5999 510 7629 òf +5999 690 2904. Risibidó eksistente di ònderstant ku tin pregunta, por tuma kontakto ku Kasnan di Bario na: +5999 724-5253 pa Kas di Bario Otrabanda/Dokter’s tuin, +5999 724-5254 pa Kas di Bario Sta. Maria, +5999 724-5252 pa Kas di Bario Brievengat, +5999 724-5251 pa Kas di Bario Punda/Banda Ariba i +5999 695 5168 pa WhatsApp di Kasnan di Bario.
