ORANJESTAD,Aruba
Stichting Monumentenfonds Aruba (SMFA) a propone algun proyecto na gobierno pa por bay riba e lista di proyectonan fast track. Ta trata di proyectonan cu SMFA tin algun tempo caba trahando riba nan, algun ya ta den un fase hopi avansa y algun ainda den e fase di estudio di factibilidad. E meta di pone e proyectonan riba e lista di fast track ta pa asina por yuda stimula e economia y crea mas oportunidad di trabou despues di e crisis cu Aruba a hay’e confronta cune debi na COVID 19.
Algun di e proyectonan aki ta falta solamente algun vergunning y ta cla pa inicia. Y manera menciona anteriormente algun ta den e fase di estudio di factibilidad pa asina por bay over na e siguiente fasenan cu ta financiamento, diseño y restauracion. Banda di proyectonan di restauracion SMFA tin tambe mantencionnan grandi cu tin cu tuma lugar na entre otro edificio Henriquez, California Lighthouse y Watertoren San Nicolas.
E promer proyecto cu lo por ser ehecuta pronto ta e restauracion di edificio di Steenweg conoci bou di e nomber di Botica Aruba. Tur cos ta cla pa locual ta e diseño di e proyecto aki, solamente ta wardando riba e monumentenvergunning pa por haci e destaho publico y asina cuminsa cu e restauracion di e monumento aki cual a wordo construi den añanan 20.
Banda di esaki SMFA actualmente ta trahando riba preparacionnan pa haci algun adaptacion na e edificio di Weststraat conoci manera Casita Geel. For di januari e edificio aki ta bashi y SMFA a logra haya un potencial huurdo. Actualmente nos ta den combersacionan cu e huurdo nobo pa locual ta e adaptacionnan pa asina por haci e peticion pa permiso di monumento na Monumentenbureau y una bes esaki keda otorga nos por cuminsa cu e trabounan necesario.
Aña pasa SMFA a haci un peticion na Hulanda pa un subsidio pa un estudio di factibilidad p’e tankinan di awa di Kibaima. Na principio di 2020 nos a ricibi e bon noticia cu ministerio di OCW di Hulanda a otorga un subsidio di 35 mil euro na SMFA pa por haci e investigacionnan necesario.
Hunto cu Stichting BOEi di Hulanda actualmente nos ta trahando riba e estudio di factibilidad pa wak si por restaura e tankinan y asina redestina esakinan pa uzo di entre otro agricultura innovativo.
Un otro proyecto hopi interesante pa cual SMFA ta trahando actualmente cu Amsterdam Manor como partner interesa ta e restauracion di e Klooster di Imeldahof pa asina duna esaki un destinacion nobo cual lo por bira un boutique hotel cu lo brinda oportunidad na studiantenan pa practica. Klooster Imeldahof ta un monumento proteha construi den añanan cincuenta y ta pertenece na Land Aruba. SMFA ta interesa pa cumpra e edificio, restaura esaki completamente y asina huur esaki.
Un otro edificio cu tambe tin atencion di SMFA ta e edificio di Aruba Bank den Caya Betico Croes. Pa algun tempo caba SMFA hunto cu Aruba Bank ta buscando partnernan interesa pa asina evalua e posibilidad di cumpra y restaura e edificio.
Por ultimo SMFA ta preparando tambe tres proyecto di mantencion grandi cual lo inclui e mantencion di e Lighthouse. California Lighthouse a ricibi desde su apertura miles di bishitante cu a subi pa disfruta di e bunita bista y cu tur esaki combina cu e locacion caminda e ta ubica ta pone cu tin mester algun mantencion. Otro monumentonan cu lo haya mantencion den e proximo lunanan lo ta edificio di Henriquez y Watertoren San Nicolas.
SMFA ta spera cu tur e proyectonan aki por logra bay riba e lista di proyectonan fast track pa asina nos por acelera e procesonan pa por cuminsa traha riba e proyectonan aki cu banda di stimula e economia tambe lo aporta na preservacion di Aruba su herencia cultural pa futuro generacionnan.
