Directiva di SKOA conhuntamente cu stakeholders, staf y personal ta den gran celebracion cu nan tremendo logro di a haya acreditacion oficial pa e programa di Erasmus+. SKOA desde aña 2022 a cuminsa e trayecto pa asina por adkiri e acreditacion pa e programa di Erasmus+ y e aña aki riba 21 di Juni 2023, Sra. Cavril Martijn y Sr. Stevan Caines a bay Hulanda pa ricibi e acreditacion pa Erasmus+ den nomber di SKOA.
Cu e acreditacion di Erasmus + SKOA, como un instituto di educacion, por contribui financieramente na proyectonan cu tin e meta pa desaroyo educacional, crecimento profesional, training, hoben y deporte cu lo tuma lugar den Europa y islanan Europeo den Caribe. E bentaha cu e acreditacion di Erasmus+ ta cu tur personal di SKOA tin e derecho pa haci nan peticion pa por haya e fondonan necesario for di SKOA pa por ehecuta y realiza nan proyecto den exterior.
SKOA ya caba ta conta cu diferente scolnan cu a participa den e programa di Erasmus+. Esakinan ta Pius X School, St. Dominicus College y St. Fransiscus, cu nan proyecto “Abilidad di siglo 21 pa Aruba” caminda un team grandi representando cada scol a bishita Spañe, Italia, Irlanda y Finlandia. Como resultado di e proyecto exitoso aki Aruba awor tin diferente partnernan internacional den e sector di educacion pa realiza entre otro e metanan di abilidadnan di siglo 21.
Scolnan cu actualmente ta cay den e promer tanda di Erasmus+, ta Scol Caiquetio, Scol Preparatorio Cacique Aterima, Agnes Kleuterschool, Prome Paso Kleuterschool y Imelda Kleuterschool, Pius X school y Scol Caiquetio cu e proyecto “Inclusion den Educacion Special” caminda cada scol lo bay bishita Iceland pa realiza nan proyecto. E team di Colegio Felipe B. Tromp ta bishitando Turkia cu nan proyecto “S.T.E.A.M. Education” y St. Dominicus College tin nan proyecto “Project Based Learning” cu lo bay bishita Iceland pa realiza nan meta pa ekipa y inspira nos futuro generacion.
Kico ta Erasmus+
Erasmus+ ta un programa di Union Europeo cu ta enfoca riba educacion, training, hoben y deporte. E meta di e programa aki ta pa moderniza educacion, training y trabounan cu hoben den ful Europa. Erasmus+ ta provee fondo financiero pa asina organizacionnan por ofrece oportunidadnan na studiante, docente, boluntarionan y tur persona cu ta traha den e liña di educacion y deporte. Erasmus+ alabes ta duna fondo pa colaboracion entre organizacion y otro institutonan educacional, organizacionnan di hoben, empresanan, fundacionnan y NGO’s y tambe ta contribui na desaroyo y reforma den paisnan di Union Europeo pa moderniza educacion, training, promove innovacion, entrepreneurship y empleabilidad. E programa aki ta wordo maneha na Brussel, Belgica pa e Erasmus+ National Agency.Staf y personal di SKOA cu ta interesa pa participa cu un proyecto den e programa di Erasmus+ mester comunica esaki cu nan cabezante directo di scol, pa asina por entrega nan proyecto den nomber di nan scol of directiva. Staf y personal di SKOA cu ta interesa pa participa cu un proyecto den e programa di Erasmus+ mester comunica esaki cu nan cabezante directo di scol, pa asina por entrega nan proyecto den nomber di nan scol of directiva.
