Tur bunita luna tin su encanto. Si, e luna na shelo leu aya ariba meymey di e streanan den oranan di anochi , pero Lady Ruth papiando di e luna “tempo”. Nos ta den e luna di Februari 2022, un tempo di amor y amistad. Un dushi tempo pa romance, roza y chuculati. Bisa otro “Mi ta stima’bo”.
Hopi lo hanja falta di e paradanan di Carnaval y ta focus ariba fiestanan y actividadnan alegre cu musica soca, calypso y hasta roadmarch, pa nan sinti menos falta di e fiesta carnal gigantesco aki.
Diadomingo nos a keiro atrobe, e biaha aki den curason di San Nicolas, pariba di brug. Nos a bay keiro bandi Baby Beach , nos por a wak con dja leu e ruinanan di locual tawata den su tempo di gloria te cu anjanan 80 nan ey, ora Lago a sera su portanan na 1985 of ta 1986 ney si mi por corda bon, ( despues a bin Coastal si mi por corda ) pasobra mi casa cu mi tawata di vacacion na Cuidad di Mexico, ora cu nos a ricibi un yamada telefonico pa laga nos sa cu Lago ta sera. Enves di a keda 2 siman na Mexico nos a keda un siman , pasobra no tawata sa kiko lo bai pasa. E resto di storia hopi sa caba, cu a focus mas ariba turismo etc. hopi hende a bai biba na Hulanda of otro caminda den exterior, caminda nan a logra hanja un otro trabao. A sinti nostalgia, ora nos tawata keiro den San Nicolas, awor cu su murayanan cu cosnan artistico pinta na color ariba nan, hopi negoshi cu trali nan dilanti , un O’neil Kitchen cu ta habri y ofrece su platonan dushi na bon prijs, Charlies bar still going strong, tin atrobe Teatro Principal di cine banda di e Bibliotheek pariba di brug. Y tin tambe awor e lugar di celebra actividadnan y fiestanan di Carnaval den e Carnaval Village y Entertainment place. Mi tambe tin famianan bibando den San Nicolas. Pero laga nos bin bek ariba e tempo di e luna aki di Februari, e luna di Dia di San Valentino, e dia di amor y amistad. St. Valentine’s day .
Diasabra awor dia 12 di Februari ta nos beurt di firma buki na Plaza Bookshop. Ruthy Vrieswijk-Bergen alias Lady Ruth lo tey presente for di 11 or di mainta te cu 1 or di merdia pa firma su buki nobo “Alegria di Ruthy Poema 2″ (pero tin oportunidad tambe pa firma e bukinan Poemanan di Ruthy y Sigui inspira pa duna.) Den un ambiente sumamente dushi di amor y amistad, nos lo aprecia boso presencia y compania sigur. Tur Lady Ruth su poemanan ta trata y of papia un of otro manera di amor. E color cora ta bay resalta meymey di tur e bunita cositanan cu Plaza Bookshop ta ofrece pa cu e toke di atencion den amor y amistad. Y si ta desea, nos lo recita algun poema di amor pa tur presente. Nos ta asina bendiciona den nos mesun relacion di amor ya bayendo pa 45 anja e anja aki. Un amor cu a bendiciona mi casa y ami cu 2 yui homber guapo balente, di bon salud, hopi sabi y hopi inspira. Y nan a bira tata, regala nos 1 nieta y 4 nieto, tambe bon di salud, sabi, talentoso , bunita y bendiciona, hasi nos welo y wela bendiciona. Y Dialuna dia 14 de Februari mes, dia di amor y amistad, lo tin “A night in Venice dinner show” na Renaissance Festival Plaza den oranan di anochi cu musica y canto di e.o. Kriss Kross y Edjean Semeleer. Nos tambe ta apoya nos dushi hendenan local y semper Go Cultura a organisa tremendo bon actividadnan social cultural musical. Danki Ed y Arthur pa stima y kere den nos cultura. Lagami termina mi relato di e siman aki, felicitando mi bunita prima Naomy, cu a celebra su di 29 cumpleanos cu un super dushi nochi di karaokee cu su sernan keri mas serca. Oh, ki bunita y dushi ambiente ! Danki Aunty Esther pa canta asina bunita pa nos !
Lady Ruth tambe por a canta bai gol. Tur su favoritonan : Jambalaya, Blue Bayou, Guitar Man y hopi mas. Pabien lieve Naomy cu salud y alegria ! You are beauty inside out ! You are the blessing !
Cu tur bo sonjonan wordo realisa y cu nos por sigui celebra cu bo hopi nochi di karaokee mas.
Danki shonnan pa lesa nos relato, corda nos invitacion di curason pa bin topa nos Diasabra awor 12 Februari entre 11or am y 1 or pm di merdia na Plaza Bookshop den curason di Dakota den Avenida Milio Croes. Nico Luydens y team di Plaza lo atende boso cu un bunita sonrisa di curason. Promoviendo nos escritor y escritoranan local cu nan obranan nobo.
Shonnan tur, sigui cuida, stay safe. Love you too !