Shonnan tur, bon dia yen di sabiduria den nos alegria. E curpa ta un crenchi dolor
di tanto baila cu e dushi musica di ‘We and We Band’ na Aruba Nautical Club den
fin di siman, pero mas despues nos lo bin cu e bunita relato ey. (Ora Lady Ruth
baila ta tur spier ta baila hunto cu ne, ufff, ta nos mesun les di zumba priva,
hahaha). Awe ta beurt di e Anochi di Dia Mundial di Poesia na Museo Cas Tan Tin.
Boso sa cu aki na Aruba nos tin varios museo. Esnan mas conoci por ta “Museo
Historico Aruba” na Fort Zoutman, y esun situa den Schelpstraat, den curason di
Oranjestad, ”Museo Arqueologico Nacional Aruba”. Tin un museo den curason di
San Nicolas tambe. Awe nos ta combersa un crenchi di “Museo Cas Tan Tin”,
situa na Pos Abao 19, den curason di Noord. E storia con e bunita ‘cas di cunucu’
aki a bira un museo, bo por tende di e manager di e museo aki, e dinamico y
guapo sr. Richard Tromp of e bunita presidente di Fundacion Mi Cutisa, sra.
Lourdes “Uti“ Martis-Bermudez. Lady Ruth hunto cu 10 otro Poeta, tawata entre
e invitadonan ariba e bunita Dia Mundial di Poesía (21 di maart 2024 ) na Museo
Cas Tan Tin. Tawata un anochi fabuloso cu hopi, pero hopi bunita inspiracion.
Otro aña, 10 di maart 2025, Fundacion Mi Cutisa ta existi pa 20 aña, y e biaha aki
a organisa un anochi di Poesia riba e Dia mundial di Poesia na Museo Cas Tan Tin,
pafor den nan cura, bau e bunita luna y streanan na shelo cu un brisa fresco di
biento. Ora nos a yega, ya Francis Jacobs tawata cla pa transmiti e evento social
cultural literario aki, mientras mas y mas hende tawata yegando. Mientras e
maestro di ceremonia Ferdinand Franca tambe tawata preparando pa habri e
anochi y presenta sra. Marushka Tromp, secretaria general di Unesco-Aruba pa
hiba palabra. E Poetanan cu a recita, tawata Emerita Emerencia, cu a causa furor
cu su tambu den su presentacion, Marcia Thiel-Giel cu a debuta na un forma
super bunita mes, Angelo Angela, Melendy Neuman, Dientje Hassell-Henriquez,
Bertha Wolf, e cantante cu segun nos, tambe a recita pa di prome biaha den
publico, e conosido y simpatico Clarette Quandus, cu ya tin 44 aña den e mundo
literario cu su bunita poemanan y presentacionnan na Boneiro y Corsou y un di
nos dushi grandinan den edad cu su amor y pasion pa skirbi, (keda pendiente pa
den futuro sercano publicacion di hopi cuenta y storianan original na nos dushi
idioma Papiamento.) E dama firme y fuerte aki ta manera un museo riba su mes.
Nos ta papiando di sra. Estefana “Titi” Tromp, cu tin e cushina na Museo
Historico Aruba dedica na su nomber.
Sra. Titi Tromp, tambe a participa na Poeta Patria 2024. Su bunita yui muhe juffr.
Miertje a sali na di 5 luga den Poeta Patria na luna di maart e aña aki. Tambe a
recita e anochi aki y John Freddy Tobon Montoya cu a sali ganador absoluto den e
competencia Poeta Patria 2024, el a recita su poema ganador “Ki bal” cu a
impacta tur presente na Cas Tan Tin masha hopi mes. Ki bunita y interesante
tawata e presentacion di Philip “Fifi” Rademaler for di nos isla ruman Corsou.
E invitado di honor aki, kende si sa ki ta poesia cu ta papia y biba den pueblo. Nos
tur por siña hopi di dje sigur. Pero, atrobe, cada Poeta ta un amor y pasion ariba
su mes cu su estilo di sinti, pensa, skirbi, expresa y recita. No tin dos mescos.
E anochi unico y special aki, tawatatin tambe dos hoben, Georvin Angela y Guizza
Maria Steenvoorde, kendenan a canta den duo e cantica “Nos curason ta bati”,
masha bunita mes. Sra. Lydia Emerencia a expresa di su curason kiko y kon e ta
wak e “Poesia” su impacto ariba su persona y aki na Aruba. Tur esaki a yena un
anochi grandi y bunita den cura Museo Cas Tan Tin. Den nomber di presidente di
Mi Cutisa y manager di Museo Cas Tan Tin, ta bay un danki diki gordo grandi na:
Fifi Rademaker, Ivan Quandus, Rosabelle Illes ,tur persona cu a contribui pa FMC
trese Fifi Rademaker Aruba, tur boluntario di FMC, tur e Poetanan y e publico pa
nan presencia, tur cu a hasi e anochi fantastico aki posibel, sin lubida e talentoso
Francis Jacobs pa tv Canal 22 y Top 95 y e gigante dinamico Jason Inesia pa
clickitaruba.com y e tremendo Comision Nacional pa Unesco di Aruba.
Lady Ruth a entrega su buki “Alegria di Ruthy Poema 2” na su colega Poeta Fifi
Rademaker y na presidente di Mi Cutisa sra. ”Uti” na final di e anochi aki, para
bao di su paraplu, manera ta su tradicion na tur e anochinan di Poesia organisa pa
Basha Foundation y Vibration PR. Nos a cumpra e buki cu poesia di Fifi “Pa steru
superficie” firma pa e gran Poeta y escritor aki, cu ta tambe pintor, fotografo,
caricaturista, actor y director di teatro y cine cu a publica ademas di e buki aki,
dos coleccion di poesia “Bos di burico” y “Di gaña gaña”. Shonnan tur, un felis dia
colma di salud, alegria y sabiduria. Danki na prensa pa otro bunita cooperacion di
curason!!
