Servisio di Kultura, Arte i Literatura (SKAL) a kuminsá ku un proyekto pa investigá i sondia si tin derecho di outor pa piesanan kultural folklóriko netamente boneriano. Ta trata di piesanan ku nos tur a lanta skucha na Boneiru komo piesanan kultural folklóriko. Por ehèmpel piesanan di San Juan i di San Pedro, kantikanan di kosecha Remailó, Sebé, Buchi Marti’ Òm Felipi, ets.
SKAL ta hasiendo e sondeo pa haña sa si tin derecho di outor pa e piesanan akí. Si esei ta e kaso, nos ke sa ta ken tin e derecho di outor pa e piesanan. Loke ta konosí serka SKAL ta, ku kada un di e piesanan ariba menshoná tin nan historia mará na dje. Ta trata aki di di historia oral di piesanan kultural folklóriko ku tin rònt Boneiru.
Komo parti di e investigashon, SKAL ta entrevistá hendenan ku konosé historia i ku konosé piesanan di Boneiru su fiestanan tradishonal. SKAL ke logra haña i reskatá e letranan original di e piesanan. E idea ta tambe pa haña sa den ki tonalidat ta toka e piesa, i ki ta e melodia i akortnan original di kada piesa.
SKAL tin pensá pa bai dokumentá e piesanan kultural folklóriko den koperashon estrecho ku hendenan ku konosé e repertorio tradishonal di Boneiru. Di e manera akí nos futuro generashonnan por disponé di informashon korekto. Dokumentando e piesanan kultural folklóriko, ta garantisá tambe sobrebibensia di nos folklor i kultura.
Personanan ku tin informashon pa kompartí, por tuma kontakto ku Felix Thomas òf SKAL na telefòn +599-7155322 òf +599-7018253, Por manda informashon tambe via meil pa skal@bonairegov.com
SKAL ta konta ku sosten i koperashon di komunidat boneriano pa asina huntu nos yuda konservá i garantisá sobrebibensia di Boneiru su piesanan folklóriko.
