Definitivamente mester aktua awor!!!
CFT tambe ta bati alarma
Ta ku inmenso doló parlamentario pa frakshon di MFK, Ramón Yung a tuma nota dje rapòrt integral ku Nederlandse Zorgautoriteit a traha riba e situashon di Curaçao Medical Center, o sea CMC. Ku hopi doló, pasó e rapòrt ta indiká klaramente ku e debenan ta muchu mas grandi ku e entradanan, lokual ta pone ku por papia di un “technische faillisement” di CMC.
Resientemente direktor di CMC, a indiká ku lo mester kòrta den e kondishonnan sekundario dje trahadónan di CMC. Parlamentario Ramón Yung a alertá pa no ta un strategia gerensia di CMC ta aplikando, p’asina logra haña gobièrnu na mesa di manera ku nan por pidi plaka pa por kubri défisitnan finansiero dje instituto.
Minister di Finansa Javier Silvania, despues di a risibí e rapòrt integral di NZa, a pone esaki na disposishon di Parlamento. CFT den un karta dirigí e siman aki na Promé Minister Pisas, Minister Silvania i Minister Pietersz-Janga ta indiká ku CMC ta sufriendo perdidanan kuantioso, kual ta trese kontinuidat den operashon dje instituto den peliger. For di yüni di aña 2020 no ta kumpliendo ku pagonan dje fiansa pa konstrukshon dje edifisio, miéntras ku gobièrnu di su parti mester kumpli ku su obligashonnan di pago na Ulanda.
CFT ta indiká den su karta ku tantu di parti di gerensia di CMC komo di parti di gobièrnu kual na final di kuenta ta esun responsabel pa e instituto, mester tuma akshonnan serio i konkreto. Si NO tuma akshon severo, lo no tin mehorashon den e situashon finansiero i e pèrdida lo sigui krese di forma inkontrolabel, di akuerdo ku CFT.
CFT ta indiká ku e situashon di CMC ta realmente prekario i esaki sigur ta kousa pa preokupashon, pasó ku e situashon sigui perdurá e kontinuidat den operashon di CMC ta kore peliger.
Parlamentario Ramón Yung ademas ta tuma nota dje echo ku e rapòrt di NZa den e parti di análisis di sifra, bou di “desaroyo finansiero” ta indiká ku e debenan di CMC ta surpasá e entradanan, pues ya por papia di un “technisch faillisement”. P’esei mester tuma e pasonan nesesario, p’asina skapa CMC di un debakel finansiero.
Pues, e situashon finansiero di CMC ta unu sumamente delikado i di preokupashon, motibu pa kual frakshon di MFK pronto lo pidi un reunion pa atendé ku Minister di Salubridat Pietersz-Janga riba e punto aki.
