ORANJESTAD,Aruba
Director di KIA y e team di maneho ta desea di informa comunidad di Aruba cu berdad tin dos trahador di KIA cu a test positivo pa Covid-19 pero cu e situacion ta totalmente bao di control. Ta asina cu durante di e siman cu a pasa, dos trahador na momento cu nan tabata pafor di KIA, pues no ta trabao a sinti sintoma.
Na e momento ey nan a tuma tur e pasonan necesario manera palabra esta di keda kas y yama nan dr. di cas pa haci test. Tambe nan a informa gerencia di KIA inmediatamente kiko tabata pasando.
Internamente hefe di cuido Dr. Aron Verschuur a tuma contacto cu DVG y bao di nan guia a realisa “Contact Tracing” pa asina investiga y identifica posibel contactonan cu e trahadornan aki por tabatin cu otro trahador of preso den KIA.
Ta bon pa menciona cu Staff di cuido di KIA for di luna di maart, na momento cu Covid-19 a ser detecta na Aruba, a haya tur informacion y training necesario pa nan ta hopi bon prepara pa na momento cu un caso positivo presenta. Pesey trahadornan ya tabata usando tapaboca y tur esnan cu ta bishita KIA, sea pa servicio of bishita preso, tabata cumpli cu e reglanan di DVG di higiena y prevencion, incluyendo bisti tapaboca.
Despues cu e dos casonan a bira conoci a duna presonan tambe tapaboca pa uza como extra medida di prevencion. Niun di e dos casonan no tin relacion cu otro y ademas; e origen di contacto tampoco a sosode den KIA.
Famianan di detenidonan y comunidad en general por ta trankil cu e situacion den KIA ta bao di control y tur medida di prevencion ta vigente 24/7. “No por descarta cu casonan positivo por surgi, sinembargo KIA su personal ta hopi bon prepara”, tabata palabranan di e director Sr. Gino Winklaar.
