Si nos laga ámtenarnan forma parti di un forma konkreto di e proseso pa yega na un Gobièrnu Nobo, despues di e Elekshon di 19 di mart 2021, e ora ei sigur nos Pueblo lo por bai haña un Gobernashon sólido i efektivo. Mester kuminsá duna e ámtenarnan nan balor i laga nan sinti ku realmente nan ta forma parti di Gobernashon di nan pais i ku ta nan ta esnan yamá pa duna Gobièrnu i Pueblo di Kòrsou, e servisio ku nos meresé.
Esaki ta opinion di Sithree “Cey” van Heydoorn, kandidato # 28 riba Lista di “MFK” kende lo okupá e puesto di Minister di BPD pa MFK. Si kontinuá ku e situashon aktual, kaminda ámtenarnan ta wòrdu neglishá, i ta tarda demasiado (lunanan largu i hasta añanan largu) pa nan petishonnan keda tratá i pa gobiernu duna un kontesta riba e petishon esaki lo trese frustrashon i lo desanimá e ámtenar pa ehersé su trabou. E ámtenar mester haña reakshon riba su promoshon (bevordering) òf traslado (overplaatsing) den un tempu di mínimo 2 luna despues ku e petishon a wòrdu hasi.
Suskrito, sigur lo boga pa trese kambio den e proseso aki i pone “targetnan” manera ya menshoná pa kumpli ku e petishonnan, pa mustra e ámtenarnan ku e ta wòrdu respetá i balorá. Na momento ku MFK e partido ku mi ta forma parti di dje, bai forma parti di e Gobièrnu Nobo, despues di e próksimo elekshon nos lo duna prioridat pa atendé tur petishon pendiente i implementá un sistema ku ta garantisá ku lo no tin retraso mas.
Mi deseo ta pa ámtenarnan sinti nan mes komo parti real di e Gobernashon, pa asina konhuntamente traha na bienestar di nos pais, di otro banda, Gobièrnu mester skucha i manehá pa evitá frikshon, esaki ku e solo meta, ku ta traha na bienestar di nos komunidat.
Mester duna ámtenarnan espasio pa nan por funshoná pa asina nan hasi uso di nan konosementu i eksperensia, i duna nan oportunidat pa nan por sigui desaroyá nan mes, i esaki sigur lo spar Gobièrnu hopi plaka, ku awor aki ta bai pa paga Consultants.
Lógikamente, ku ámtenarnan tambe mester koperá i ehekutá nan tarea na un manera optimal i íntegro, i no laga ningun sorto di polítika i/òf organisashon polítiko influensiá nan. Si huntu nos kumpli i komprometé nos mes ku e kousa prinsipal ta sirbi Pais Kòrsou, konfiansa den nos Aparato Públiko lo sigui krese serka nos siudadanonan.
Aktualmente tin hopi reklamo riba funshonamentu di ámtenarnan, pero si Gobièrnu invertí den su forsa laboral i rekonosé e balor di kada ámtenar, lo no tin duda ku e aparato gubernamental lo haña e elogio ku e meresé di Pueblo di Kòrsou.
No lubidá ku nos Kurason ta Bati pa Kòrsou!!!
