Apesar di inkompetensia di Gobièrnu e hóbennan Sion Janga i Jonathan Cranston ta bishita COP27 na Egipto
Ta asina ku di 6 di novèmber te ku 18 di novèmber, ta tuma lugá e konferensia anual COP27 di klima na Sharm el-Sheikh na Egipto. COP27 ta un konferensia kaminda presidentenan, ministernan, organisashonnan i kompanianan di rònt mòndu ta bini huntu pa formulá solushonnan konkreto pa metigá e efekto di kambio di klima.
Di Hulanda a bai un delegashon ku ta konsistí di Minister Presidente Rutte, Minister responsabel pa Klima Rob Jetten, Minister responsabel pa Finansa Sigrid Kaag, Minister responsabel pa Infrastruktura i Awa Mark Harbers huntu ku nan ámtenarnan i tambe dos hóben Hulandes ku ta representá e bos di hóbennan di Hulanda.
Despues di basta “lobbymentu” Sion Janga a logra konvensé Hulanda pa laga Boneiru tambe bira parti di e delegashon Hulandes, kual ta nifiká ku pa prome bes den historia desde 10/10/10, Boneiru ta tuma parti na konferensia di nivel haltu ku Hulanda.
E konferensia aki ta hopi importante segun Sion Janga. Pa motibu di e rapòrt ku Greenpeace a saka kaminda investigashonnan di VU (Vrije Universiteit Amsterdam) ta laga mira ku Boneiru ya kaba ta sufriendo di kambio di klima i ku esaki lo bira pió si no intervení. Segun Janga Boneiru por bira un isla kaminda diferente pais nan ta usa pa eksperimentá ku diferente solushon nan pa kambio di klima pa wak kua lo funshoná si òf nò, debí ku Boneiru ta un isla chikitu i ta bon situá. Asina aki Boneiru por hunga un ròl mas importante den e tópiko di kambio di klima i por risibí mas atenshon internashonal.
Komo ku Sion ke pa mas hóben partisipá na tipo di konferensia nan aki pa asina nan por trese nan idea, solushonnan i opinion nan dilanti. E la invitá Jonathan Cranston, Julia Martinus i tambe Maria Roldan. E idea ta pa poko poko hasi e grupo mas grandi ya asina mas hóben por haña oportunidat pa dialogá i trese input dilanti na ámtenarnan i minister nan ku ta traha maneho i tuma desishon pa Boneiru. Ta importante pa nos yunan di tera forma parti di e tipo di desishonnan aki, ya e identidat di e isla no ta bai pèrdí.
Mester bisa ku e sosten di parti di Gobièrnu a laga hopi di deseá, tantu ku a pidi koperashon i yudansa for di Yüli for di Gobièrnu i tòg Gobièrnu a laga sa ku nan no ta haña ku e tópiko aki ta di importansia. Ta danki na Nina den Heyer, Daisy Coffie, Adely Jansen, Tafila Janga i Ivonne Obersi ku a logra pusha pa tòg por a logra trese e hóbennan aki na Egipto pa nan por representá nan isla i bin ku ideanan ku den futuro lo por keda implementá na Boneiru.
