ORANJESTAD,Aruba
Diasabra awor 12 di september lo ta e prome biaha cu e programa Career IQ lo ta den aire for di e radio stacion Cool 98.9 FM. Sigur un partnership nobo unda cu Career IQ a scohe pa forma parti di e radio stacion aki cu ta gosa di un tremendo sintonia rond di Aruba.
Career IQ Aruba ta un programa na radio presenta pa Kareline van der Linden y Darice Solognier unda cu tur siman den cada temporada ta brinda varios conseho practico y eficiente enfocando riba e lidernan local den nos comunidad tocante con cada un di nos por desaroya nos propio carera, alcansa nos metanan y logra disfruta e bida cu nos tur ta desea. Ademas di esaki e programa tin un seccion asina yama “Surviving 8-5” unda ta ofrece e tipnan practico riba diferente area laboral, y tambe tin career coach of psycologo cu ta yuda contesta diferente pregunta nan cu abo por tin ariba e area nan aki.
A lansa e show na 2019 y awe e ta den su di 5 temporada cu mas di 50 entrevista cu diferente lider nan local ariba diferente aspecto nan di nan carera. Tur e episodio nan aki ta disponibel ariba Podcast di Career IQ y website https://careeriq.buzzsprout.com/
Asina a yega di entrevista sra Shadey Figaroa human resource manager di A.T.A. y Vice Presidente di AHRA cu tipnan pa aplica pa trabou na Aruba, Sr. Hose Figaroa ariba derecho nan laboral, Sr. Jan Noordzij ariba mercado laboral, Minister President sra. Evelyn Wever-Croes ariba carera politico y Liderazgo, y differente entrepreneurs manera Mark Benson, Julissa Ras di Paper Sisters, Rammy Ramada di Patrishi Sports, Lay Hing de Kort-Yee di Cornerstone Economics, sin lubida diferente lider nan den diferente area di nos comunidad manera Sra. Luenne Gomez-Pieters di Departemento di Impuesto, Sra. Ronella Tijn-Asjoe Croes di A.T.A, Sra. Tisa LaSorte di AHATA, Sr. Ewald Biemans di Bucuti, Sr. Edsel Lopez y mucho mas.
Na banda di esaki, Career IQ a yega di entrevista hoben nan tambe den carera y diferente vision cu nan tin pa Aruba, hoben nan den diferente sector manera Rosabelle Illes den e sector creativo, Gerlien Croes como profesional hoben den politca, Dwight Leoneta como musico, Ryon Dijkhoff y Larissa Bermudez cu nan diferente experiencia nan como profesional hoben.
Awor Career IQ ta cla pa lansa su di 5 temporada cu diferente topico y perspectiva nan encuanto carera y desaroyo profesional. No obstante e crisis cu nos ta aden awor, ta importante pa keda siña di otro, scucha otro perspectiva nan, comprende diferente desaroyonan economico y socio-cultural na Aruba pa asina keda traha riba e desaroyo di nos hende nan.
Diasabra awor pa 10or di mainta na Cool FM 98.9 sintonis’e.
