Sint Maarten, Kòrsou i Aruba a firma e akuerdo di fiansa pa refinansiamentu di e fiansanan di Covid. Hulanda a mustra boluntat pa refinansiá e fiansanan na un balor di 1,17 miar euro, pa motibu ku ya tabata konosí ku e Paisnan no ta kapas pa paga esaki den un biaha. Durante pandemia di Covid e fiansanan tabata nesesario, pa motibu ku e Paisnan mes no tabata disponé di sufisiente medio finansiero pa frena e konsekuensianan negativo di Covid, i pues tabatin mester di sosten den esaki.
Banda di e fiansanan Hulanda a duna e Paisnan den e temporada ei yudansa humanitario na balor di mas di 220 mion euro.
Riesgo pa kaha di gobièrnu
E negosiashonnan tokante e kondishonnan pa refinansiamentu ta kana for di febrüari di e aña aki. Hulanda tabata dispuesto na refinansiá e fiansanan kontra un interes abou si e Paisnan lo a kumpli ku algun kondishon. Esaki tabata nesesario pa motibu ku Hulanda mes tambe mester fia plaka ku interes, 3,2%, pa hasi e refinansiamentu posibel. A pidi tur pais pa hasi un kalkulashon independiente di e refinansiamentu. Asina por a determiná e karga di debe pa kada pais. Na mes momentu e Paisnan por a presentá nan plan pa mehorá e ekonomia. Banda di esei tabatin algun kondishon spesífiko pa Aruba, Sint Maarten i Kòrsou ku mester yuda e paisnan aki ku ta finansieramente vulnerabel evitá problemanan finansiero den futuro. Hulanda a buta e kondishonnan aki pa motibu ku e riesgo pa e paisnan i Hulanda ta sumamente haltu si no kumpli ku pago di e fiansa.
Aruba
Despues di konsultanan intensivo ku Aruba e dianan tras di lomba, a ahustá e akuerdo di fiansa riba algun punto. Hulanda ta ofresé Aruba refinansiamentu di mas aña di e debe kontra un interes di 6,9%. Esaki ta den liña ku e interes ku Hulanda lo pidi paisnan ku un ‘creditrating’ abou, igual na esun di Aruba. Si Aruba bai di akuerdo ku e Lei di Reino, e pais ta bin na remarke pa un interes mas abou di alrededor di 3,4%. Un Lei di Reino ta nesesario pa motibu ku e ta kontribuí na bon maneho finansiero. Ta un kondishon importante pa finansa públiko sano pa tambe den temporada di kontratempu por realisá sufisiente invershon pa abitantenan. Hulanda ta dispuesto di papia tokante di adaptashon di e proposishon di lei aktual, pero ta konsiderá importante ku no por adaptá normanan di presupuesto unilateralmente.
Kòrsou
Pa tantu Kòrsou komo Sint Maarten tabata nesesario di tin un akuerdo atministrativo pa un plan di reskate finansieramente realístiko i sólido pa e kompania di seguro debilitá, ENNIA. Un plan di reskate tabata nesesario pa motibu ku entrante promé di yanüari 2024 tabatin e peliger di pobresa pa 30.000 asegurado na ámbos pais. Tantu e abitantenan komo e Paisnan lo haña nan konfrontá ku konsekuensianan personal i sosial grandi. Apesar ku Kòrsou a firma e akuerdo di fiansa, e la mara tres kondishon na esaki. Hulanda a bai di akuerdo ku dos di e kondishonnan aki. Ta trata di un reserva dor di Konseho di Minister di Kòrsou i – si esaki ta nesesario – di parlamento pa aprobashon di e akuerdo di fiansa. Hulanda sinembargo ta konsiderá esaki komo kondishonnan terminante pa e akuerdo di fiansa. Esaki ta nifiká ku e akuerdo di fiansa ta kaduká si no bin aprobashon di e konseho di minister òf parlamento di Kòrsou. Esaki ta buta ku hinter e fiansa lo ta apto pa reklamá di inmediato. E di tres kondishon di Kòrsou ta toka e kontenido di e akuerdo di fiansa. Hulanda a presentá su interpretashon di esaki i a puntra Kòrsou si esaki ta kuadra. Asina ku Hulanda risibí e konfirmashon aki, lo tin un akuerdo definitivo ku Kòrsou tambe pa e akuerdo di fiansa.
Sint Maarten
Sint Maarten tabata promé pa firma e akuerdo di fiansa despues ku anteriormente el a duna di konosé ku e ta bai di akuerdo ku sea un inisio nobo òf likidashon di ENNIA. Pa e motibu aki Hulanda a ofresé Sint Maarten un refinansiamentu a korto plaso kontra e interes mas abou (3,4%). Asina yega un solushon sólido pa ENNIA ku kua tur Pais ta bai di akuerdo, lo kombertí esaki den un fiansa di plaso largu unda mensualmente ta paga interes so (aflossingsvrij), meskos ku a akordá anteriormente
