For di aña pasa tin un situacion delicado na Queen Beatrix International Airport (AAA) . Sindicato STA ta e sindicato cu ta representa mayoria di e trahadonan, den e caso aki for di aña pasa, pero lamentablemente ainda no por yega na otro cu gerencia di AAA NV .
Segun Presidente di sindicato STA Diego de Cuba e situacion di AAA NV ta cu practicamente AAA NV ta sigui cu e reorganisacion. Segun e sindicato e 59 personanan cu mester a bay cu e reorganisacion 50 di nan a tuma pakete boluntario y tin 9 cu lo bay corte. Sinembargo banda di esaki no mester lubida cu AAA NV tin un contracto colectivo pa esunnan cu ta cay bao di esaki . Loke ta un realidad ta cu tin un division entre e trahadonan cu ta esunnan cu tin un Individuele Arbeidsovereenkomst cu ta un contracto individual, pero tambe tin esunnan cu ta cay bao di e contracto colectivo.
Presidente di sindicato STA ta duna di conoce cu esunnan cu ta cay bao di e contracto colectivo actualmente ta 143 trahado, 117 ta cay bao di e departamentonan operacional cu STA ta representa actualmente. Segun de Cuba mirando loke ta pasando actualmente a sinta varios biaha na mesa cu gerencia di AAA NV riba e problematica cu nan a keda sin paga e bonus di fin di aña di 2020 y te ainda no por yega na otro.
Pa es motibo aki a dicidi di cana e caminda di corte unda cu a entama un kortgeding. Na e momento ey AAA NV a pidi pa para e kortgeding na dos ocasion pa asina sinta na mesa, pero na momento cu ta sinta na mesa no ta yega na otro y AAA NV no kier paga e bonus. Segun Presidente di sindicato STA na e momento ey a dicidi pa laga hues dicta.
Segun e sindicato AAA NV tin un contracto colectivo y e mester keda implementa den su totalidad y no aplica e contracto parcialmente. E contracto colectivo ta dividi locual cu ta e deber nan di e trahado y locual ta e derechonan di e trahado. Sinembargo por a tuma nota cu AAA NV ta solamente aplicando e debernan so y e derechonan ta dies corta nan na e manera cu nan ta desea, segun Presidente di sindicato STA esaki no por.
Pesey mes a haci apelacion na gerencia di AAA NV y tambe a haci apelacion na e director nobo di AAA NV unda cu a duna un amplio splicacion con a yega na e contracto colectivo debi cu no ta for di shelo e la cay .
Segun Presidente di sindicato STA e contracto colectivo aki tabatin su trayectoria unda cu ta bin ta mehorando cada bes cu negosha. Mester bisa si cu tabatin añanan dificil tambe, pero di 1997 bin ariba te na e momentonan aki tin e parti di e bonus di fin di aña cu ta hinca den e contracto colectivo y no por corta den dje manera ta haya ta bon, segun Presidente di sindicato STA .
E echo cu gerencia di AAA NV ta keda terco riba e bonus di fin di aña a dicidi di laga un hues dicta un sentencia pa wak si e trahadonan cu tin e contracto colectivo tin rason si of no. Ta di lamenta cu AAA NV no kier wak e situacion di otro manera y e situacionnan aki por conduci accionnan innecesario.
Segun Presidente di sindicato STA, STA por a pone accion masha tempo caba, pero a scoge pa trata e situacion aki cu hopi trankilidad debi cu apesar di tur cos Aruba ta keda depende di turismo e ta nos unico pilar economico te ainda, berdad tin hopi plannan pa diversifica pa bin cu otro sistema di entrada cu ta otro pilarnan economico pero esey lo bay tuma su tempo.
Sinembargo aparte di e contracto colectivo STA tin un acuerdo firma caminda cu den e añanan cu a transcuri tabatin un otro bono cu e otro trahadonan ta haya dependiendo di nan esfuerso poni na trabao y pa fin di aña nan ta keda evalua, si nan evaluacion tabata bon nan ta keda premia pa esey. Sinembargo e parti aki tambe a cay afo.
Sindicato STA no a preocupa mucho pa e parti ey tampoco debi cu ta compronde e situacion di e compaña y tabata desea hasta pa vries e aumentonan di 2021 y 2022 splicando AAA NV cuanto placa nan ta spaar den e dos añanan aki, pero tog nan ta scoge di keda terco, segun Presidente di sindicato STA Diego de Cuba.
Pa e motibo aki mes a dicidi cu awo si ta bay corte pa asina haya un decision di hues, pa despues por sigui negosha pa e contracto colectivo nobo. Tambe den corto tempo sindicato STA lo pone un referendum pa full aeropuerto mirando cu tin otro sindicatonan cu ta tira piedra riba caminda.
