Sindicato SPA a yama un conferencia di prensa mirando cu nan miembronan ta basta preocupa riba e situacion di uniform. Esaki ta reina un disgusto den KPA principalmente na e coleganan cu ta traha riba caya. Presidente di sindicato SPA Rodney Solognier ta duna di conoce cu tin practicamente 3 aña sin di tin un uniform nobo.
For di basta tempo caba ta trece e preocupacion aki den man di leiding pero no ta haya oido, sinembargo e momento a yega y ta basta coremento tras di otro. For di aña 2021 a papia riba uniformnan nobo cu e polis nan a haya e tempo ey debi cu e uniformnan no a resulta bon. E uniformnan a yuda pa un tempo pero nan a yega na nan punto final y ainda no a resolve e situacion di uniform pa polis.
Lamentablemente tin coleganan cu actualmente tin 1 uniform so y cu e 1 uniform aki nan mester laba tur dia despues cu nan yega cas pa asina e siguiente dia cu nan mester bay traha nan tin uniform limpi pa asina por ta representabel na trabou. Sinembargo mester bisa si cu minister Rocco Tjon actualmente ta haciendo su esfuersonan y a mustra na sindicato tambe kico nan a haci caba, pero sindicato SPA ta kere cu e problema aki no ta e mandatario , pero na esunnan cu ta encarga cu maneho KPA.
Na mes momento ta kere cu esunnan cu ta encarga pa busca uniform no ta mira y sinti e preocupacion mescos cu e miembronan den KPA. Tin coleganan ta traha 16 ora pa dia y despues di 16 ora mester bay laba uniform pa por traha e siguiente dia, un situacion no humano. Presidente di sindicato SPA Rodney Solognier kier yega na un clarificacion pa e uniformnan keda procesa mas lihe cu ta posibel paso e situacion ta birando uno alarmante.