Dia promé di mart último, riba fecha natal di defuntu sra. Ariadne Faries, Minister di Enseñansa, Siensia, Kultura i Deporte, sr Steven Croes, a proklamá pa e promé siman di mart di tur aña keda konsiderá komo “Siman Nashonal dediká na Arte den Skolnan di Kòrsou”. Esaki ta nifiká ku tur aña inisiando for di 2021 durante e promé siman di mart, skolnan ta implementá e proyekto “Mi kreashon ta sigui biba”. E proyekto ta enserá ku skolnan ta dediká atenshon na i siña di obranan riba tur aspekto di arte i ta stimulá muchanan pa nan mes deskubrí talento di arte den nan.
Gobièrnu di Kòrsou tin entre otro komo aspirashon pa stimulá kalidat di arte i kultura, salbaguardiá herensia kultural i motivá kreatividat artístiko i intelektual di nos pueblo. Arte ta nesesario i indespensabel den skolnan, komo ku esaki ta aportá entre otro na formashon i desaroyo kreativo di nos muchanan i ta un vehíkulo importante pa sostené siñamentu serka nos muchanan. Konsiderando esaki Minister di Enseñansa, Siensia, Kultura i Deporte ke ekspresá gratitut pa tur e trabounan desplegá pa sra. Ariadne Faries ku a sa di sostené e kontenido di enseñansa na Kòrsou di un forma kreativo pa medio di arte. Tur material eskolar ku sra. Ariadne Faries a ilustrá ta duna muchanan un sosten den nan siñamentu i ta stimulá nan fantasia.
Durante un bunita seremonia den seno chikitu, akompañá pa sernan kerí di sra. Ariadne Faries, Minister di Enseñansa, Siensia, Kultura i Deporte a ofisialisá e proklamashon akí i asina a inisiá e proyekto “Mi kreashon ta sigui biba”. Akshonnan konkreto di parti di e ministerio pa ku e proyekto akí ta:
- Artistanan ta bishitá skolnan pa konta i spliká nan arte i bida artístiko pa asina stimulá i promové mas konosementu riba e área akí serka nos muchanan;
- Skol ta hasi eksposishon di tur lokual muchanan a produsí den e “Siman Nashonal Dediká na Arte den Skolnan”, kombiná ku arte di diferente artista di Kòrsou i spesialmente arte di sra. Ariadne Faries;
- Krea oportunidat struktural i igual pa muchanan di skol por ekspresá/diskubrí nan talento den forma di arte visual;
- Inisiá i desaroyá kompetensia di arte den skolnan di Kòrsou;
- Forma un komishon ku ta konsistí di Sektor di Enseñansa i Siensia i di Sektor di Kultura i Deporte, pa kordiná e “Siman Nashonal Dediká na Arte den Skolnan”.
Pa mas informashon di sra. Ariadne Faries i su arte por tuma nota di e website: https://curacao-art.com/artists/ariadne-faries/. Athunto un komplashon di potrèt na momento ku a dekretá e promé siman di mart komo Siman Nashonal dediká na Arte den Skolnan di Kòrsou.
1 comment