Pa prome biaha Boneiru ta bai organisa “Siman di Muziek pa mucha”. Esaki ta algu ku ya pa algun aña kaba ta wordu organisa na Hulanda.
E biaha aki Boneiru tambe lo ta parti di e selebrashon aki.
ACE Founbdation a keda aserka dor di Fundashon Betie Doran(Korsou) i tambe Stichting Kindermuziek week (Hulanda) pa organisa e siman di muziek pa mucha na Boneiru. Sin pensa dos biaha ACE Foundation a asepta e reto. “E idea a bin un tiki riba man pero nos ta ban hasi algu maske ta chikitu e aña aki i spera ku e por krese i bira algu grandi manera “siman di buki pa mucha”. Asina Presidente Segni Bernardina a bisa.
Na Hulanda un total di 13 organisashon ku tin di haber ku musika ta partisipa i pone nan forsanan huntu pa tur aña logra 10 dia di konsientisashon, informashon riba e arte di musika.
E aña aki na Boneiru nos ke kuminsa ku un siman i e meta ta pa durante di 1 siman muchanan di 0 pa 12 aña por gosa di skucha, hasi i toka muziek. Te asta traha instrument.
Desaroyo di musika ta kontribui na e desaroyo kognitivo i sosial emoshonal di un mucha.
Pa e motibu ei ACE Foundation kier a hasi un apelashon na hinter Boneiru pa durante di e siman aki pa pone atenshon na e arte di musika i purba di hinka esaki for di chikitu den nos muchanan.
Despues di e pandemia di Covid ku a hinka nos den hopi stress ta un bon momentu pa nos ban laga e muchanan usa musika pa trese alegria tur kaminda.
E thema ta Amistad. Pues durante di e siman aki nos lema lo ta:
“Abo i ami ta amigu i Muziek ta nos amigu.”
Nos ke aserka tur organisashon musikal ku ke hasi algu den e siman di musika pa mucha pa tuma kontakto ku ACE Foundation durante di e siman aki pa asina nos por interkambia i jega na un programa jen di musika, tayer, konsientisashon i motivation pa nos muchanan na skol, den bario na kas i mas.
Pa mas informashon of si bo ke duna bo aporte na siman di musika pa mucha tuma kontakto ku ACE Foundation na number di telefon 7965677.(Segni Bernardina) email: acesbonaire@gmail.com of Facebook page: ACE Bonaire.
