Djasabra ultimo ACE Foundation a habri siman di muzik pa mucha durante di e programa di Nos Zjilea ku ta tuma luga na Magazina di rei.
E atardi a kuminsa ku palabranan di Direktor di ACE Foundation Sr. Segni Bernardina ku a splika ku e tema di e aña aki ta “Mi Kultura ta Uni-Ko”. Esaki ta un wega di palabra.
E tema di Siman di Muzik mester laga nos muchanan i nos mayornan kompronde ku e kultura di Boneiru ta Uniko, e ta uni i e ta uni kos.
Durante di dia di Rincon i Simadan bo por mira ku Boneiru ta un Isla ku no ta importa rasa kolo religion ni nada tur hende por uni i traha huntu pa progreso di Boneiru.
E idea ta pa durante di e siman di muzik pa mucha motiva e pensamentu aki ku musika. Pa e motibu ei ACE Foundation a produsi 7 kantika nobo pa mucha.
Un kantika pa kada dia di siman. Kada kantika ta pone atenshon na e aspektonan ku ta hasi nos kultura uniko. E piesanan por gran parte ta kompososhon di Xechell Jacobs. E otro komposishonnan ta di Segni Bernardina i Xemio Jacobs.
ACE Tweens Club a graba huntu ku Xechell konosi komo Bauco. Tin dos kansion ku ta kanta pa Zhea Ayubi i tambe Melody Jacobs. Asinaki ACE Foundation ke kontribui na kantikanan ku letranan ku ta sano pa mucha i hende grandi tende. Kansionnan ku ta eduka motiva konsientisa pero tambe entretene.
Un produkshon ku ta riba youtube. E album yama tambe Mi kultura ta uniko. Riba e youtube channel di ACE Foundation, bo por haña tur e kantikanan i nan letra pero tambe bo por mira dos videoclip nobo ku ta “Indjan Arowak” i “Kultura”.
Despues di palabranan i splikashon di Segni Bernardina a sigui palabranan di representante di Fundashon Wega di Number Bonaire, ku a kontribui pa asina ACE Foundation por a produsi dos video clip pa siman di muzik pa mucha. Fundashon wega di number ta kontentu di por hasi esaki pa di tres aña konsekutivo. Seguidamente direktor di MCB Bonaire señor Leonard Domacasse tambe a bisa ku nan ta aploudi e inisiativa pa bin ku mas muzik pa mucha i ta pa esei nan ta sostene e projekto. Mirando ku nan ta un banko ku tei pa sostene kosnan positivo pa nos komunidat i siman di muzik pa mucha ta sigur un di nan. Esaki ta di dos aña ku MCB Bonaire ta duna su aporte.
Despues a sigui un tremendo show di ACE Tweens Club produsí pa Zoë Bernardina ku asistensia di Damari Alonzo, Berti Komproe i Jasir Gressmann. E show a kontene tur e shete kantikanan di e album Mi kultura ta uniko. E show tabata karga ku baile aktuahon i kanto di nos muchanan ku tabata hopi bon prepara. E show a keda parti den dos parti. E di dos show a keda presenta na final di Nos Zjilea i a hiba di titulo “E kultura di awa”.
Aki e hobennan di ACE tweens club a presenta e diferente maneranan ku awa ta konekta nos kultura ku otronan.
Tabata un atardi kaminda sigur tur ku a asisti a gosa i tabata tin komentarionan manera ”un show na nivel”, “ Hopi profeshonal”,“Bunita mensahe” etc.
ACE Foundation a gradisi Magazina di Rei pa e koperashon pa asina por a hasi e apertura di siman di muzik na Magazina di rei.
E siman di muziek ta sigui e siman aki na tur skol ku varios aktividat. Djaluna ayera djaluna tabata tin apertura na Kristu Bon Wardador, djawebs lo tin un konsierto di Classical Music Board pa skolnan na Jong Bonaire. Djabierne lo klousura na Skol Amplio Papa Cornes i anochi lo bai tin un “livestreaming via di e kanal di Live 99.9”. Durante hinter e siman aki mainta Tio Breezy lo deleita nos muchanan manera semper ku kantikanan pa mucha na kaminda pa skol via di su kanala Breezy FM, Atardi tambe ora di bai kas. Durante hinter siman lo dedika atenshon na muziek pa mucha. Na Live 99.9 lo tin un programa tur atardi 17:00 -18:00 pa asina papia di kultura i toka varios kantika pa mucha.
Finalmente un yamada di parti ACE Foundation pa nos tur ban duna atenshon na musika ku ta sano pa nos muchanan i ban kompone mas kansion bon pa muchapor skucha.
