Dialuna a habri cu e siman di defensa di e acusadonan den e caso Avestrus. A cuminsa dialuna cu e dos acusadonan amigo, esta ex Minister Benny Sevinger y Pieter Sussebeek.
Sevinger tin diferente acusacion contra dje manera abuso di poder, soborno, labamento di placa y malversación. Acusacionnan cu su abogado mr. David Kock durante su defensa dialuna mainta a bisa cu no por keda proba.
E mandatario, su abogado a bisa, no a abusa di su poder pasobra e tabata e minister encarga cu Infrastructura ora cu el a firma e peticionnan. E ta e mesun procedura cu a wordo uza pa e minister prome cune Marisol Lopez Tromp. P’esey e ta puntra di con den caso di Sevinger ta papia di corupcion y den caso di Marisol Lopez Tromp no.
Tur e tereno otorga na e compananianan a sigui e mesun procedura cu e mas di 300 otro peticionnan comercial cu el a firma tampoco pero cu OM no ta papia nada di esaki.
Inclusive tabatin caso cu el a firma pa otro hende, cu no ta nada conoci di dje haya un tereno sin sa cu e tereno aki tin un peticion haci pe caba. El a simplemente firma y skirbi abou cu e no tin nada contra y duna cooperacion.
Ta hopi hende a haya tereno comercial pero cu OM ta haci comosifuera ta e acusadonan den e caso aki so a wordo priveligia cu tereno. Y e no a yega enrikise su amigonan tampoco, ni Sussebeek. E ultimo aki ya caba tabatin proyecto desaroya balora na miyones di dollar prome cu Sevinger a bira minister.
Den oranan di merdia tabatin e defensa di Sussebeek na encarga di mr. Illes.
Diamars mainta tin e defensa di Leoncita A., y Mary W. y den oranan di merdia tin esun di Rebecca R. y ex coordinador di e minister Frederick E. Diaranson tin e defensa di Ninosca N., Gaby W., y Carlo M. y den oranan di atardi Fiscal ta reacciona riba e pleidooinan hiba caba. Prome parti di defensa ta finalisa diahuebs cu esnan di Curt H., Ewald B. y Franklin A.