Siman di cultura 2023 na Curaçao

Pueblo di Curaçao ta celebra Siman di Cultura 2023, di dia 24 di september 2023 pa 3 di October 2023. Dia 3 di October ta fecha cu Gobierno Hulandes ta bai rehabilita nos Heroe Nacional Tula. Gobierno di Curaçao a decreta un aña di Conmemoracion Abolicion di Sclavitud cu ta for di 1 di Juli 2023 te cu 1 di juli 2024 y pesei Siman di Cultura 2023 ta keda dedica na conmemora 160 aña di Abolicion di Sclabitud. Cu e lema pa e siman di Cultura: Lasonan Fuerte pa un futuro briante, Curaçao ta enfoca riba Libertad, Igualdad y Franternidad. Tur esaki como antesala den cuadro di rehabilitacion di Tula.

Siman di Cultura ta un antesala pa consientisa pueblo di e acto importante di e rehabilitacion di Tula y ta gosa di actividadnan tanto dirigi pa pueblo di Curaçao y turistanan. Nos historia ta conta cu 160 aña pasa oficialmente sclabituc a keda aboli, a marca un punto di cambio den e historia di Caribe y Mundo. Esaki a nifica e final di un periodo scur di oprecion humano y explotacion, pero tambe a laga un herencia duradero cu ainda bo por sinti su efectonan den nos cultura y comunidad. Tur esaki ta pone lus riba e balentia di nos Heroe Nacional y su compañeronan. Nos Pueblo ta gosa di un herencia rico cu ta keda manifesta den nos cultura. Pesey den Siman di Cultura nos ta celebra hunto y ta crea lasonan fuerte pa un futuro briante pa nos Pueblo. Como pueblo nos mester realisa cu hunto nos ta logra mucho mas cu di forma individual. Pa e motibu aki ta masha importante pa forma lasonan di hermandad. Siman di Cultura ta un momento den aña cu nos ta haci diferente actividad hunto y sera conoci cu nos mesun talentonan y potencial pero tambe esun di e otro. Interactuando cu otro nos ta fortifica nos lasonan di hermandad cu otro. Mas tanto nos uni den nos metanan comun mas resultado nos lo tin como pueblo.