ORANJESTAD,Aruba
Na Corsow den un encuesta 78 % a vota pa un gemeente, 13 % pa mantene e Status Aparte y 7 % ta desea un independencia, na Aruba e sosten y deseo ta pueblo ta mustra cu e ta bai den mes un direcion.
Via Diario t.v. mi ta wak programanan y noticia di Corsow y eynan tambe bo ta nota cuanto corupcion politiconan a comete contra di pueblo. Periodistanan y esnan cu ta presenta diferente shownan no tin miedo pa demostra nan disgusto con Corsow a ser maneha door di tur gobiernonan.
Nos di Movimiento Futuro ta hopi contento di por a denuncia y ta sigui denuncia tur loke ta pasando ariba nos pais y hopi ta e sostennan cu nos ta ricibiendo.
Awendia nos ta biba den un pais cu hendenan bon prepara bon studia y nan no ta acepta pa acepta, ni tampoco pa emocion o tradicion, pero ta wak nan futuro, futuro di nan yiunan y di nos pais. Kiko politiconan ta defiendiendo actualmente ta AUTONOMIA, cu 6 aña pasa e a ser entrega caba y e siman aki e resto lo ser entrega, na unda nos politiconan lo para un banda wak con nos pais lo ser maneha den un forma stricto y corecto, na bienestar di henter nos pueblo y cu lo disfruta di loke e progreso lo trece cune.
Un pais manera Aruba bon maneha sin corupcion, fabornan politico, polticonan miyonario por ser considera e MONACO den Caribe y Latina America. Creador a regala nos tanto panorma, beach, nos propio hendenan, pa awe nos ta para na rand di un cataclismo. Den un pobreza total, cu hendenan y tristo pa bisa cu muchanan pober. Ainda e crisis no a pasa.
Grita y instiga pueblo contra Hulanda ta e cos mas cruel cu ta existi, debi sin Hulanda nos no por a sobrevivi. Shonnan for di 1634 nos ta HULANDES, cu hopi orguyo, cu un pasaporte bon sigura. Hopi ta nos hobennan cu a termina un estudio profesional na Hulanda y hasta a ricibi un “studielening” Hulandes. Critica Hulanda pa tur cos ta e gratitud di mas cruel cu un pueblo por haci contra di esun cu ta pone cuminda ariba mesa den un tempo asina dificil.
Hopi ta contra Hulanda, pero ningun kier perde nan pasaporte Hulandes.
E siman di berdad a yega na unda tur partidonan sea den parlamento, gobierno o cu ta activo a acepta pa lucha den mal forma contra Hulanda, pero cu e resultado cu nos AUTONOMIA lo bai ta uno ficticio , domina completamente door di Hulanda. Ta mas cu claro cu Hulanda tin condicionnan pa sigui hinka placa di nan pagado di belasting pa yuda un pais na rand di bancarota, pero cu politiconan miyonario.
Adios autonomia, adios Status Aparte. Nos lo ta di luto e siman aki?Otro pregunta cu lo ser descuti ta cual partido a entrega nos autonomia, nos Status Aparte?
