Den kabamentu di aña 2022, tráfiko insigur ta eksigí mas bida. M21 ta konsiderá komo un di e responsabilidatnan grandi di kualkier gobernashon ku nan ta brinda siudadanonan ku ta trafiká riba nos kareteranan siguridat. E siguridat akí den su forma máksimo ta enserá ku e kareteranan ta bon asfaltá òf tin kualkier otro material komo kapa, pero ta enserá tambe ku tin espasio pa peaton por kana riba un bon asera i ku siklista òf otro vehíkulo no motorisá por move riba un pida di e kaya den un forma mas sigur posibel. Pero tambe e kareteranan mester tin indikashon, manera liña i tambe bòrchi di tráfiko ku ta garantisá e siguridat aki. Opviamente esnan ku ta hasi uso di e kareteranan mester hasi esaki den un forma responsabel, manteniendo nan mes na tur e reglanan di tráfiko, inkluyendo mantené nan mes na e velosidat preskribí.
Ora a konstruí Kaya Nikiboko Sùit, a hasi esaki anunsiando ku e kaya akí lo a bira e modelo pa e kayanan mas prinsipal ku ta kondusí pa sentro di siudat. A konstruí e kaya akí ku sufisiente hanchura pa vehíkulo motorisá, pero tambe a pèrkurá pa na banda tabatin asera adekuá pa peaton i tambe a konstruí un espasio bon pa vehíkulo no motorisá, manera baiskel, ròlstul i vehíkulo di velosidat abou. Ku e konstrukshon akí lo mester a kuminsá un era nobo di konstrukshon di nos kareteranan mas prinsipal, kaminda siguridat den tráfiko tabata e guia prinsipal i tambe ku e konstrukshonnan mester tabata duradero. Sinembargo nos por a tuma nota ku e pensamentu aki a para pareu ku e Kaya Nikiboko Sùit i ku pa motibu di popularismo polítiko sin vishon a kremenchá e fondonan pa rehabilitá nos kareteranan i a bai over na e sistema bieu di lapi aki lapi aya ku e konsekuensia ku tur e kayanan prinsipal ku ta kondusí na sentro di siudat ta mediokre i a bira insigur. M21 ta referí aki na Kaya Amsterdam, kaminda ketu bai te awe ningun hende ta responsabel pa e debakel di e rotònde. Nos ta referí na Kaya L.D. Gerharts, Kaya Nikiboko Nort, Kaya Grandi te na Voz di Bonaire, Kaya Gobernador Debrot te na e rotònde di Hotèl Chogogo i otro kayanan rehabilitá. Tur e kayanan aki a risibí solamente un kapa di asfalt so, miéntras ku nan a keda smal i sin un bon asera i ‘fietspad’ i ademas ku falta di indikashon manera e liñanan i bòrchinan di tráfiko ku tin ku indiká kaya di preferensia etc. Nos no ke papia mes di e sistema di dirigí e awa ku komo konsekuensia ku durabilidat di e konstrukshonnan akí tambe lo ta minimal i pronto nos tin yen di kaya kibrá atrobe.
Durante tratamentu di tantu kambio di presupuesto 2022 komo presupuesto pa 2023 oposishon a proponé pa usa e fondonan ku no a usa den 2022 i esnan èkstra ku lo a bin pa aña 2023, kombiná ku fondonan ku Ulanda a pone disponibel pa rehabilitá nos kareteranan, pa bin ku kayanan duradero i ku provishonnan pa garantisá máksimo seguridat den tráfiko. Pero manera semper e aktual gobernashon a tene duru na nan lema di popularismo sin vishon di laga asfalt kore i ku tur e konsekuensianan di esaki pa nos siguridat den tráfiko.
M21 ku sosten di pueblo den e próksimo gobernashon lo trata na koregí e fayonan aki. Nos ta konsiente ku mester di fondonan kuantioso pa rehabilitá i konstruí kayanan sólido i duradero riba nos isla, pero nos lo no laga esaki bai a kosto di siguridat den tráfiko. Si realmente desaroyo di nos isla ta pa e HENDE, antó nos mester usa e fondonan tambe pa sirbi e HENDE, den e kaso spesífiko akí siguridat di tur hende den tráfiko. Nos lo traha duru den e añanan binidero pa rehabilitá i konstruí kareteranan riba nos isla ku ta kubri tur e aspektonan di siguridat nesesario i ku ta duradero. I na nos partisipantenan den tráfiko, sea bo ta un outomobilista, un siklista, un koredó di skuter òf motosaikel òf kualkier vehíkulo (no)motorisá, pero tambe abo ku ta partisipá den tráfiko na pia, un yamada di kurason pa aktua responsabel den tráfiko i yuda na bo propio siguridat i siguridat di otronan. Ta huntu nos tin ku kontribuí pa un tráfiko sigur na Boneiru.
Laga nos kuminsá awor i ku pa loke ta e sobrá dianan di aña 2022 nos sera e aña den un forma alegre, kontentu i ku kada un di nos ta kontribuí pa un tráfiko sigur i ku nos lo sigui ku e aktitut positivo aki tambe den aña 2023. Mensahe di M21 pa seguridat den tráfiko ta:
- Pa tur ku ta partisipante den nos tráfiko komportá nan mes.
- Pa nos vehíkulo ta den bon estado
- Pa nos kareteranan ta den bon estado.
- Mantené nos mes na regla di tráfiko
- Bon formashon i informashon pa tur esnan partisipante den tráfiko.
