Parlamentario independiente Ryçond Santos do Nascimento ta kere cu ta importante pa nos sa y ripara cu e topico di taxista ta wordo politisa demasiado. Mester bisa cu tin hopi interesnan politico cu ta hunga rond di henter e proceso aki y no tin nada di haber cu e taxistanan pero tin tur cos di haber cu e partidonan politico.
Sinembargo loke cu ta e problema mes cu ta e caminda di e parti legal ta e punto y nos tur riba e pida baranca aki mester compronde cu ta prohibi pa bo transporta hende a cambio di placa y tin un excepcion den esey cu ta via di un landsverordering cu ta un ley. Un landsverordering ta crea un excepcion pa esun cu tin e permiso di taxi.
Si mester duna un ehempel, ta mes un cos cu ta prohibi pa bo core riba e careteranan publico di Aruba alomenos cu bo tin un rijbewijs y e ora tin un excepcion pa e ciudadano. Si e ciudadano no tin rijbewijs bo no por core riba e careteranan publico di Aruba, Esaki ta un sistema di permiso.
Awo ken ta esun cu ta duna e permiso? Minister mester evalua na ken e ta duna permiso abase di criterionan paso esey ta principionan di bon gobernacion. Loke cu mester ta bon cla cu no ta e ciudadano ta dicidi na ken e permiso ta bay.
Sinembargo den tur e problema di e taxistanan e landsverordering personen vervoer e ta haci un excepcion unda cu e ciudadano taxista por pidi e minister traspasa e permiso aki pa un integrante di su famia. Ta trata aki den caso cu un persona den e famia ey ta pidi e permiso den caso cu e taxista a fayece of den caso cu e taxista ta hopi malo y e no por eherce e trabou como consecuencia cu e hogar ey ta bay keda sin e entrada ey cu ta pone cu e famia ta drenta den un situacion precario.
Segun parlamentario Parlamentario independiente Ryçond Santos do Nascimento den tipo di casonan asina por pidi minister pa traspasa e permiso di taxi. Sinembargo loke cu ta pasando na Aruba loke cu minister Ursell Arends ta bin ta combati, ta cu na e pais aki hopi minister den pasado a uza e articulo aki no pa e casonan cu e ley ta describi pero pa faborece. Segun Parlamentario independiente Ryçond Santos do Nascimento esaki ta henter e problema cu tin. E escenario aki ta mes un problema cu ta wak na DIP, DIMAS , ontheffing den caso di paul croes y tambe den caso di Benny Sevinger.
Segun Parlamentario independiente Ryçond Santos do Nascimento tipo di articulonan aki ta crea buraco nan den ley unda cu minister nan por a haci y deshaci, esaki ta e curason di e problema. Sinembargo si mester wak e dos MB nan cu minister a bin cu ne , e MB ta duna e impresion cu den ningun caso e lo haci un excepcion , anto esey lo no ta husto.
Sinembargo awo despues di tanto palabracion e mandatario a indica cu e ta bin cu un MB number 3 pa asina clarifica cu lo haci un evaluacion den tur caso paso esey ta e trabou di e minister, awo den e MB 3 lo pone cu lo haci un evaluacion den casonan excepcional unda cu e taxista a bira malo of unda cu e taxista a fayece, esey ta husto y esey ta den ley caba.
Na momento cu minister ta desvia for di esaki y ta haci politikeria cu henter e problema aki ta muestra cu ta mantene un sistema di faboritismo politico unda cu ta mantene corupcion riba e pais aki y nos mester combati esaki.
