Kisas hopi di nos no ta consciente, pero e matanan di mangroven ta esencial pa nos como ser humano y e bida maritimo. Giancarlo Nunes ta hefe di research y conservacion di Fundacion Aruba Nacional Park y ta duna di conoce cu si e serhumano ta consciente cu e matanan di mangel tin asina hopi balor y cu e ta asina importante , e serhumano no ta tira sushi y laga sushi den nan.
No ta solamente e serhumano ta depende di e mata di mangroven, pero e bestianan tambe ta depende di esaki. Segun Giancarlo Nunes di Fundacion Aruba Nacional Park e mangelnan ta e criadero di e bestianan di lama, e piscanan, cangreu, lobster ect ect, tur e bestianan aki nan bida ta cuminsa den e matanan di mangroven. Pesey mes ta importante pa mantene e partinan aki limpi sin sushi y tampoco no kap e matanan importante aki.
E mensahe ta hopi cla cu companianan cu kier kisas un pida tereno pa construi, pa nan sa cu e peticion ta keda pa conserva e matanan aki y educa e turistanan di e importancia e matanan aki y laga nan siña un poco loke cu ta di nos y kico ta loke ta proteha nos aki na Aruba.
Loke cu ta un realidad cu e matanan di mangroven ya caba ta hopi schaars na Aruba y pesey mes mester pone extra proteccion pa nan. E matanan di mangroven tin un balor asina grandi pa nos como ser humano cu te ainda hopi di nos no ta consciente di dje. Tambe nan ta un proteccion pa nos costanan. E sistema di mangel no ta para riba su mes, e sistema di e matanan di mangroven mester ta conecta cu yerbe di lama y cu coral. Na momento cu tin e tres nan aki e ora tin un sistema sano.
Segun Giancarlo Nunes na momento cu e piscanan, cangreu of lobster cuminsa cu nan bida, dus ora cu nan nace nan ta nace den e sistemanan di e mangroven y door cu nan ta hopi chikito e matanan di mangroven ta proteha nan di e bestianan cu ta mas grandi.
Na momento cu e piscanan, cangreu of lobster bira teenager e ora nan ta drenta den e sistema di yerbe di lama cu ta cerca di e matanan di mangroven. Si e pais tin un sistema di mangroven sano unda cu e piscanan ta nace y si tin e sistema di yerbe banda di dje e ora cu nan bira teenager nan ta sali bay den e yerbe nan y den e yerbe nan ta keda protegi unda cu nan ta crece bira un poco mas grandi y na momento cu nan bira adulto nan ta sali bay den e sistema di coral y asina ta haya e siclo di piscanan, cangreu of lobster den e sistema di coral unda cu nan ta liber y na momento cu nan conoce nan pareha nan ta broei y e siclo ta cuminsa atrobe unda cu e babynan ta nace den e mangrovennan despues bira teenager ta bay den e yerbe y despues nan tambe ta bira adulto y ta bay den e sistema di coral, asina e siclo ta y produccion pa anos por haya cuminda riba mesa, unda cu ta pisca y gara e piscanan mas grandi pa por come, si nos no respeta e siglo aki mañan anos como serhumano no tin cuminda pa pone riba mesa, nos por bay pisca cuanto biaha cu nos ta desea di subi lama pa pisca no lo haya cuminda si nos mes no proteha of respeta e parti aki di naturalesa.
