A tuma lugá e kulminashon di un aña di trabou hasi dor di e ekipo di ACE Foundation i miembronan di ACE Tweens. Durante e show aki ku un durashon di algu mas ku 1 ora, 9 hóben di ACE Tweens a sa di trese un presentashon riba nivel, kombinando drama, baile, músika i deklamashon pa trese un historia ku un mensahe importante pa pueblo di Boneiru.
E historia a sigui Yelena, un hóben ku ta preokupá ku e direkshon den kua su generashon ta bayendo. Ku guia di alma di su defuntu wela, e ta bai un biahe den tempu pa hóbennanpasado, presente i futuro pa harma su mes ku e konosementu nesesario pa e trese un mensahe kla i raspa pa e hóbennan di awendia.
Durante tur dos anochi e públiko presente a sa di biba ku e presentashon i na final di tur dos anochi por a tende solamente reakshonnan positivo di parti di e públiko. “E mihó show ku mi a mira aki na Boneiru” un di e persona nan ku a bin wak e promé anochi a publiká riba media sosial.
ACE Foundation kièr a yama un danki na tur ku asistí na e dos dianan aki. Nan presensia sigur ta kontribuí na e siguiente paso di ACE Tweens. E hóbennan aki lo bai Aruba dia 10 di July kaminda ku nan lo bai partisipá den Gang di Arte Aruba. Aki nan lo bai haña diferente tayer di profeshonalnan internashonal i tambe nan lo bai traha un show nobo ku e hóbennan di Aruba. Banda di esaki tambe lo bai presentá e shownan Mi Kultura ta Uni-Ko i ACE-WOOD: One step closer to Hollywood na Aruba.
ACE-WOOD: One step closer to Hollywood a wòrdu skirbi i produsí pa Zoe Bernardina, ku guia adishonal di Berti Komproe riba e parti di drama, i Damari Alonzo-Santos riba e parti di koreografia. Xechel Jacobs tabata produktor i kantante di mayoria di e kantikanan ku por a skucha durante e show, ku tambe ta riba e albùm di Mi Kultura ta Uni-Ko. Xemio Jacobs a produsí Indjan Arowak. Melody Yacobs i Zhea Ayubi tambe a kolaborá ku nan stèm riba e albùm aki.
ACE Foundation ke yama un danki Entidat Públiko Boneiru, Prins Bernhard Fonds Caribisch Gebied, Fundashon Wega di Number Boneiru i Madura & Curiels Bank Bonaire ku a para tras di e proyekto aki. Un danki tambe ta bai na Live 99.9 FM, Breezy FM ku a kere den e hóbennan aki i ku tur dia ta tokando kantikanan ku tin riba e albùm. Un danki tambe na tur negoshi i instansia ku a kontribuí ku e show dor di kumpra karchi
Pueblo di Boneiru keda pendiente, paso tin mas kos great na kaminda pa mucha, hoben i famia disfruta di dje!
