Sheila Tromp Cabesante Colegio Pius X: Pius X School a ricibi shete Flipboards pa nan klasnan

Como scol ganado di e proyecto EduTech, 

Pius X School ta un di e scolnan ganado di e proyecto di EduTech. Señora Sheila Tromp, cabesante di e scol, a expresa durante un entrevista cu su persona ta sumamente contento cu Pius X School a logra di ta un di e ganadonan di e proyecto aki, mirando cu nan ta un scol innovativo, cu un team dinamico trahando semper na bienestar di e muchanan. Cu e fondo ricibi, nan a logra haya 7 “flipboards” pa nan klasnan, cual ta di gran beneficio pa nan por duna les adecuadamente. 

Señora Tromp a indica tambe, cu e scol na e momento aki ta bezig cu un tipo di eseñansa adaptivo, cu ta algo nobo na Aruba pa loke ta e scolnan basico. Nan ta traha cu un sistema Snap It cu ta ful personalisa, y pa esaki, e materialnan incluyendo un “flipborad” tabata necesario. 

Techonologia ta un gran parti di bida, y p’esey ta importante pa scolnan tambe cuminsa aplica digitalisacion den enseñansa. Pius X no ta uzando bukinan mas sino tur cos ta digital, motivando e muchanan hopi mas den nan estudio. E resultado tambe ta bisto den e muchanan. 

“Proyectonan manera esaki, ta di gran beneficio pa enseñansa pasobra nan ta yuda e scolnan pa yega na e nivel di technologia necesario. Nos ta motiva e scolnan pa haci uzo di fondonan asina manera Futura y EduTech cu ta brinda e oportunidad di logra un soño cu kisas riba un otro forma bo no lo yega asina facil. E ta tuma un poco tempo pa pone algo asina den otro pero hunto nos por logra cosnan grandi den bienestar di nos muchanan” Señora Tromp a expresa.