Recientemente a tuma luga e di cuater edicion di e sesionnan di brainstorm ‘Pensa, Scucha, Recupera Mihor’ organisa pa Partido di Pueblo Arubano (AVP). Na e occasion aki a enfoca riba e sector social cu e tema di ‘Seguridad Social y Oportunidad Igual.’ Entre e participantenan tabatin varios organisacion local, incluyendo Fundacion Pa Nos Comunidad (FPNC) representa pa su director Gianaika van der Biezen. FPNC a trece un bista cla di e situacion actual, como tambe kico por spera y kico ta necesario pa sigui yuda nan clientenan. Na final e anochi, el a expresa su satisfaccion indicando cu e ta kere cu e encuentronan aki “ta algo fructifero pa Aruba.”
Tambe a splica cu cooperacion cu diferente organisacionnan no ta facil, ya cu ta rekeri hopi conocemento pa yega un solucion. “Mas ainda mirando cu Aruba ta den un situacion hopi precario cu ta haci cu e proximo lunanan hopi hende no tin e seguridad, …e parti social, …e entrada, … e ayudo.” Van der Biezen ta combenci cu sintando hunto den un sesion di brainstorm caminda tur hende ta duna nan opinion y ta identifica e situacion, por yega mas facil na un solucion. Cada stakeholder invita a comparti informacion cu e delegacion di AVP consistiendo di mr. Mike Eman, drs. Mervin Wyatt-Ras, mr. drs. Arthur dowers y mr. Gerlien Croes.
E partido ta busca pa conoce e perspectiva cu e organisacionnan social riba nos isla tin riba e retonan pa seguridad social y oportunidad igual na e momentonan aki, ademas di kico ta e recomendacion pa Aruba recupera y recupera miho. “Nos aporte tabata pa mustra con grandi e necesidad ta na famianan cu tin necesidad y esey ta mustra cu Aruba toch mester un apoyo pa duna e famianan aki y con nos ta bay haci esaki,” van der Biezen a bisa.
Proximamente AVP lo continua cu e serie di sesionnan aki caminda lo enfoca, e biaha aki, riba e topico di enseñanza.
