Riba 1 i 2 di òktober último un seshon di Catshuis a tuma lugá na Sint Maarten. E okashon di e seshon aki tabata pa sigui ku e kombersashonnan rondó di e tema di Pasado di Sklabitut. Sekretario di Estado pa Relashonnan den Reino Alexandra van Huffelen a habri e seshon di Catshuis huntu ku Direktor-General pa Kultura i Media, Barbera Wolfensberger i entre otro invitadonan for di Kòrsou, Aruba, Sint Maarten, Boneiru, Saba i Sint Eustatius ku ta traha riba e tema di Pasado di Sklabitut a asistí.
Riba djadumingu 1 di òktober Ministerio di Asuntunan Interior i Relashonnan den Reino huntu ku Ministerio di Edukashon, Kultura, i Siensia a tene un presentashon siguí pa un pènel di diskushon. Invitadonan tambe a risibí e oportunidat pa kompartí progreso riba nan propio isla riba e tópiko pa asina interkambiá idea, konosementu i stimulá kolaborashon mas estrecho.
Djaluna 2 di òktober a duna splikashon mas aleu tokante e Komité di Konmemorashon ku ainda mester establesé i e Areglo pa inisiativanan sosial i mehorashon di maneho. Ta trata di un areglo di 200 mion euro ku a anunsiá desèmber último pa henter Reino Hulandes i Sürnam. E suma aki ta partí den tres parti igual pa Hulanda, Sürnam i parti Karibense di Reino, ku ta nifiká un máksimo di 33 mion euro pa kada área pa inisiativanan sosial i 33 mion euro pa mehorashon di maneho. Despues di esaki a sigui algun seshon di break-out parti mèrdia den kua invitadonan por a bai mas den detaye tokante tópikonan manera archivo, historia oral, Edukashon & Kultura i e komité di Konmemorashon.
A klousurá e seshon di Catshuis ku un kombersashon entre invitadonan, Sekretario di Estado pa Relashonnan den Reino i Direktor-General pa Kultura i Media.
Di e seshonnan a resultá ku tin un nesesidat grandi pa bon kolaborashon entre e islanan i kompartí konosementu i ‘best practices’.
Ministerio di Asuntunan Interno i Relashonnan den Reino i Rijksdienst Caribisch Nederland a organisá e seshon di Catshuis di dos dia na Sint Maarten i a konektá ku e simposio di e grupo di trabou Interinsular.
