Integrashon Responsabel ta un trayekto pa personanan ku promé ku 13 di mart 2020 a yega Kòrsou di forma legal, pero ku aktualmente ta permanesé di forma indokumentá riba nos isla. E grupo akí por risibí un pèrmit di estadia temporal. E persona ku ke apliká mester kumpli ku tur rekisito vigente, manera stipulá den lei i maneho.
Ministerio di Hustisia a hasi un análisis ekstenso na 2020, pa determiná di ki forma por atendé ku personanan indokumentá den nos komunidat. Motibunan humanitario a hunga un ròl importante. Ademas kontribushon di e personanan akí den kaha di Pais Kòrsou ta un faktor determinante. Esaki ta representá alabes un di e benefisionan prinsipal pa introdusí e maneho temporal akí.
Tin un lista di rekisito spesífiko basá riba e motibu pa kua e persona por apliká pa e pèrmit. Un di e rekisitonan ta ku e persona ku ta apliká mester a yega Kòrsou promé ku 13 di mart 2020 di forma legal. Tin rekisitonan general tambe ku ta konta pa tur hende. Esaki ta enserá: prueba di pago, pasport bálido, akta di nasementu di no mas ku dos aña bieu, antesedente penal di no mas bieu ku 13 di mart 2019 i deklarashon di garantia. Tur persona ku ta kalifiká por apliká riba www.immigrationcur.org. Riba e portal akí por haña un lista di tur rekisito nesesario. Por apliká solamente si ta kumpli ku tur e rekisitonan akí.
E proseso di aplikashon ta inisiá na momentu ku e persona ku ta apliká yena e formulario kompleto riba e portal, i agregá tur dokumento nesesario kompañá pa eventual formularionan adishonal inkluso e prueba di pago ku ta nesesario. Na momentu ku tur rekisito a pasa via e portal, Servisio di Atmishon ta registrá e aplikashon i manda e komprobante di registro di e petishon pa e persona ku a apliká. E proseso di análisis i desishon final ta dura un máksimo di 6 luna despues di e fecha di aplikashon. Por apliká for di 22 di mart te ku 22 di sèptèmber 2021 riba www.immigrationcur.org.
