Sertifikado di klup di futbòl PSV pa mas òf ménos 250 mucha

Mas òf ménos 250 futbolista hóben di 6 pa 15 aña a risibí un serifikado di klup di futbòl PSV pa nan partisipashon na un programa di treinen. Kuater treiner di PSV Soccer Schools a trein e muchanan for di 19 te 30 di yüni di e aña akí. Den kolaborashon estrecho ku Instituto Deportivo Boneriano, Indebon, i PSV a hinka e programa den otro.

E treinernan a keda impreshoná ku e partisipashon fanátiko di e muchanan: ‘Tabata un eksperensia bunita. Nos ta kontentu ku nos a kompartí nos konosementu i ku nos por a aportá na desaroyo di e talento futbolístiko na Boneiru.’ Esaki ta loke Vincent Blancke, treiner di U12 i alabes kordinadó tékniko di PSV a duna di konosé.

Diputado James Kroon ta wak bèk ku satisfakshon. ‘Mi ta haña tremendo ku nos hóbennan a haña e oportunidat úniko akí pa siña for di e treinernan profeshonal di hóben di PSV. I mi ta kontentu ku asina tantu hóben a hasi uso di e oportunidat akí.’ Terrence de Jongh, hefe na Indebon, ta pone énfasis riba importansia di e treinen. ‘E muchanan ku a partisipá ta mas motivá awor pa sigui desaroyá nan mes komo futbolista. Nan ta nos futuro, e kolaborashon ku PSV ta nifiká masha hopi pa nos.’

E treinen ta forma parti di un akuerdo pa kolaborashon ku Entidat Públiko Boneiru a sera ku PSV na aña 2022. E dos partidonan ta traha entre otro huntu riba tereno sosial i riba tereno di futbòl. E treinen di luna di yüni ku ta tras di lomba ta un ehèmpel di esaki. Despues di e éksito di e treinen na Boneiru, awor akí ta wak kon PSV i Entidat Públiko Boneiru por traha mas tantu huntu ainda riba tereno sosial.

Riba tereno ekonómiko tambe PSV i Entidat Públiko Boneiru ta kolaborá ku otro. Por ehèmpel un mishon komersial hulandes ta bishitá Boneiru den luna di novèmber di e aña akí. E ora ei empresanan lokal por hasi kontakto ku empresanan hulandes i interkambiá konosementu. Ta posibel tambe ku despues di a sera konosí, nan ta bai traha huntu ku empresanan hulandes i partnernan di PSV.

E forma di kolaborashon akí ta kuadra ku e aspirashon di gobièrnu pa yega na un desaroyo ekonómiko duradero di Boneiru. I pa yega na un ekonomiá ku tin su base riba diferente pilá. E intenshon ta pa den futuro nos ta ménos dependiente di turismo.