E seremonia pa abolishon di sklabitut riba djaluna 1 di yüli 2024 ta den signo di
konmemorashon, impakto i futuro. Durante e konmemorashon ta para ketu tambe na
klousura di e aña di konmemorashon di pasado di sklabitut. Ta tene e enkuentro for di 08:30
or te 11:00 or na Plaza Wilhelmina. E programa ta konsistí di un parti ku diskurso i un parti
kultural musikal. Entidat Públiko Boneiru ta invitá tur hende pa asistí na e enkuentro i honra
nos antepasadonan pa nan kurashi i nan forsa.
E konmemorashon ta kuminsá ku suplamentu di karkó, un tradishon den músika boneriano.
Gezaghèber interino Ingrid Sealy i Representante di Reino interino Jan Helmond ta tene un
diskurso.
E historiadó Arthur Sealy ta kordinadó di e Grupo di Diálogo. Sealy ta tira lus riba e nesesidat
pa desendientenan di hendenan ku nan a hasi katibu, nos komunidat i Hulanda sinta na
mesa pa papia tokante por ehèmpel aseptashon di e trouma di sklabitut. Sedney Marten,
miembro di direktiva di Akademia Papiamentu, ta papia tokante lès i inspirashon for di
pasado pa konservashon i kresementu di nos lenga materno, papiamentu.
E organisadónan a hinka un programa kultural variá den otro ku entre otro un presentashon
di e skol di baile School of Performing Arts. E artista di ‘spoken word’ Queshantely Martinez,
ta deklamá. E perkushonista Shaba, huntu ku otro músikonan, ta toka den stail di müzik di
zumbi, hasiendo uso di instrumènt manera berimbau, barí i karkó.
Pa Jennifer Pocornie-Martis, presidente di e grupo di trabou 1 di yüli ta importante ku ta
konmemorá abolishon di sklabitut tur aña di nobo na Boneiru. Pocornie-Martis ta spera ku
hopi hende lo ta presente na e seremonia dia 1 di yüli 2024.
Seremonia pa abolishon di sklabitut den signo di konmemorashon, impakto i futuro
