Konseho Sosial Ekonómiko (SER) a emití awe, djaluna 23 di
desèmber 2024, su konseho pa Parlamento tokante un proposishon di inisiativa di lei pa reforsá e
regulashonnan di tabako na Kòrsou. E proposishon, presentá pa frakshon di MFK den Parlamento, ta buska
protehá salú públiko, spesialmente bou di hubentut, kontra e popularidat kresiente di vapes i otro produktonan nobo di tabako sin huma. Segun e inisiadónan di e inisiativa di lei, e lei aktual no ta sufisiente pa enfrentá e desafionan moderno.
Entre e medidanan proponé ta resaltá oumento di edat mínimo pa kumpra produkto di tabako i sigaria
elektróniko pa 18 aña; atvertensia di salú obligatorio riba e empake den e tres idiomanan ofisial (Papiamentu, Hulandes i Ingles); i ampliashon dje prohibishon pa huma na inkluí sigarianan elektróniko, ku òf sin nikotina.
Restrikshon riba propaganda i promoshon lo ta mas fuerte, spesialmente na lugánan kaminda menornan di
edat ta frekuentá, manera skol i tereno di deporte.
E inisiadónan ta indiká ku e proposishon di e inisiativa di lei ta basá riba rekomendashonnan di e Konvenio riba
kòntròl di tabako di Organisashon Mundial di Salú (WHO). Aunke Kòrsou no ta partido na e konvenio aki, e
inisiativa di lei su intenshon ta pa aliniá e regulashonnan lokal ku e kuadro di e konvenio internashonal aki pa
protehá salú públiko. Tambe, e proposishon dje inisiativa di lei tin komo ophetivo restringí uzo di tabako kalentá i vapes, ku no ta regulá den e leinan aktual.
E nota splikativo ku ta kompañá e proposishon dje inisiativa di lei ta indiká ku kampañanan di konsientisashon i edukashon na públiko en general lo ser finansiá for di fondonan eksistente, miéntras ku multa pa violashon por generá ingreso adishonal pa kaha di gobièrnu.
SER a evaluá e proposishon dje inisiativa di lei for di un perspektiva tékniko i práktiko pa wak faktibilidat i
efektividat di su implementashon.
E proposishon dje inisiativa di lei akí ta bini na un momento krusial kaminda riba nivel mundial tin un push pa
regulashon mas estrikto di uzo di tabako i produktonan similar, teniendo na kuenta e preokupashon grandi ku ta eksistí riba e forma agresivo di merkadeo ku industria di tabako ta uza pa bende produktonan nobo na
spesialmente hóbennan. Ku e esfuerso legislativo aki, no solamente ta purba enfrentá e retonan lokal di salú
públiko sino alabes ta manda un señal kla ku Kòrsou tin un kompromiso serio pa ku esaki ku riba senario
internashonal.
E deliberashonnan den Parlamento riba e proposishon di e proyekto di inisiativa di lei aki lo determiná futuro di kòntròl di tabako na Kòrsou i por marka un momento krusial den maneho di salú públiko di nos isla.
