SER ta haña presentashon riba introdukshon di florin karibense

E ekipo di banko sentral di Kòrsou i Sint Maarten (CBCS), ku ta enkargá ku e proyekto di introdukshon di florin karibense, a tene, djabièrnè 16 di yüni último, un presentashon na Konseho Sosial Ekonómiko (SER) riba introdukshon di florin karibense, ku tur probabilidat lo tuma lugá den e di tres kuartal di 2024.

Na momento ku Kòrsou i Sint Maarten a atkerí e status di pais outónomo den Reino Ulandes dia 10 di òktober 2010, e Areglonan di Estado di Kòrsou (artíkulo 88) i di Sint Maarten (artíkulo 100) ta stipulá ku lo tin un supervisor (CBCS) pa kontrolnan monetario, finansiero i di integridat.

En kuantu e banko sentral kompartí i su kuadro normativo pertinente, Kòrsou i Sint Maarten a yega, inisialmente, dia 26 di novèmber 2008, na akuerdonan di prinsipio ku posteriormente, durante e reformanan konstitushonal, a ser konsagrá den e Statutonan di Banko Sentral di Kòrsou i Sint Maarten. Esakinan tin komo puntonan klave: establesimentu di un banko sentral komun komo entidat hurídiko públiko, kreashon di un union monetario i un moneda komun ku ta basá riba un kambio fiho ku dòler estadounidense.

Statutonan di banko sentral ta preskribí den artíkulo 1 ku florin karibense lo ta e moneda ofisial di e dos paisnan i ku CBCS lo ta e entidat enkargá pa fiha e tipo di kambio ofisial di divisa, teniendo na kuenta e balor di florin karibense (artíkulo 9).

Entre otro e debate riba posibel “dolarisashon” a retrasá introdukshon di florin karibense. Sin embargo, aktualmente e atenshon ta fihá riba aplikashon di e kambio monetario importante aki.

E presentashon ku e ekipo di CBCS a tene na SER, komo e órgano konsultivo i di konseho di gobièrnu i di parlamento di Kòrsou, ta un paso importante den preparashon di introdukshon di florin karibense ya ku e ta garantisá transparensia i kompromiso di interlokutornan sosial, ku na su debido tempu lo por kondusí na un kresementu ekonómiko inklusivo i sostenibel. Opteniendo posibel respaldo di SER, e ekipo di CBCS posiblemente lo por sigui enkaminá un transishon responsabel i satisfaktorio na e moneda nobo ku na su turno lo por kontribuí na fomentá stabilidat ekonómiko i prosperidat den e union monetario.