Konseho Sosial Ekonómiko (SER) a entregá un informe konsultivo ekstenso
awe na Minister di Salú, Medio Ambiente i Naturalesa (GMN). E informe ta trata e reformanan ku ta ser proponé den e proyekto di lei ku ta rigi regulashon di merkado di salú, ku e meta prinsipal pa mehorá efisiensia i reorganisá finansiamentu di salubridat públiko na Kòrsou.
Un di e puntonan importante den e proyekto di lei ta e rekomendashon pa duna e responsabilidat pa supervisá e kumplimentu di stándar di kalidat den e sistema di salubridat públiko na e Outoridat Regulatorio di Kòrsou (Regulatory Authority Curaçao, RAC), ku anteriormente tabata konosí komo Bureau Telecommunicatie & Post (BT). Ku esaki, RAC lo haña e tarea pa kontrolá kumplimentu di e normanan di kalidat den sektor di salú, loke ta enserá ku e sistema di regulashon di e sektor lo ser sentralisá.
SER ta konfia ku su rekomendashonnan lo ta relevante den toma di desishon riba e reformanan di salú, na
momento ku Kòrsou ta buskando un balansa entre efisiensia den gastunan di kuido i duna servisio médiko di kalidat ku ta aksesibel pa tur habitante di e isla.
