Bonaire Holding Maatschappij NV (BHM) ta kontentu di por anunsiá ku despues di mas ku 12 aña nan a klousurá ku éksito e buskeda pa un direktor statutario nobo pa su empresa Telefonia Boneriano NV (Telbo). E akshonista di Telbo NV a nombra señor Jacobo Gregorio Colina, mihó konosí komo Gregory Colina, komo direktor statutario entrante luna di aprel proksimo.
For di promé di yüni 2009 BHM tabata temporalmente formalmente enkargá ku maneho di e kompania Telbo NV en espera di un direktor statutario nobo. Apesar di diferente intento den pasado pa rekrutá i nombra un direktor statutario nobo, esaki no a logra. Pa e motibu aki aña pasá a start atrobe ku un trayekto di rekrutamentu i selekshon a base di un profil di funshon ku akshonista a stipulá.
Di e mas ku 20 solisitut risibí, a skohe 6 kandidato potensial a base di un selekshon di karta i promé entrevista dor di e kompania Linkels & Partners. Despues di e promé buelta di selekshon, diferente kombersashon mas i ‘assessments’ a kontinuá kaminda un komishon di evaluashon a skohe señor Colina komo e kandidato mihó kualifiká pa okupá e funshon aki. E komishon di evaluashon a raportá esaki na e hunta di komisario. Despues di a analisá e rapòrt minesiosamente, e hunta di komisario a sigui e konseho di e komishon di evaluashon i a nominá señor Colina na e akshonista.
Señor Gregory Colina tin mas ku 25 aña di eksperensia ku telekomunikashon i konosementu amplio di e materia tékniko. E tin un diploma di ‘Master of Science in Global Management’ ku spesialisashon den ‘Business Innovation’. Durante su karera señor Colina a krese di business unit manager ‘IT Support Services’ i manager ‘Customer Care’ te ku ‘deputy Chief Operational Officer’ na un di e kompanianan di telekomunikashon di mas grandi riba nos islanan den Reino Hulandes.
Banda di su spesialisashon riba e tereno di telekomunikashon, señor Colina ta hopi aktivo riba e tereno di guia i formashon musikal, loke ku parsialmente tambe a kontribuí na su nombramentu komo ‘Ridder in de Orde van Oranje Nassau’.
E konosementu i eksperensia amplio komo tambe e embolbimentu sosial di señor Colina lo ta na
benefisio di Telbo NV i e komunidat Boneriano pa kue un rumbo nobo ku servisio di telekomunikashon ku lo ta di pueblo i pa pueblo ofresé dor di e kompania di telekomunikashon Telbo NV.
