Desaroyo di San Nicolas ta keda prioridad pa Gabinete Wever-Croes. Durante e reunion di Conseho di Minister diamars ultimo na San Nicolas, diferente proyecto a keda presenta pa varios inversionista cu ta interesa den desaroya San Nicolas. Prome Minister Evelyn Wever-Croes a duna di conoce cu lo haci follow up riba e proyectonan aki, di cua ya algun a cuminsa caba.
Señor Alberto Perret a presenta un proyecto di hotel na San Nicolas y den su presentacion el a enfatisa e potencial di San Nicolas pa un proyecto di e magnitud aki.
“Nos ta sumamente contento pa a ricibi e invitacion pa ta presente durante di e Conseho di Minister na San Nicolas como un di e inversionistanan principal den e area, ta palabranan di sr. Alberto Perret.
Sr. Perret ta kere firmemente den e potencial di San Nicolas y den e tipo di bishitante/ turista cu ta desea otro actividad y experiencia durante nan bishita na Aruba cu ta diferente di locual tin na Merca. A base di e encuentro ta mustra cu tur cos ta bayendo den bon direccion pa inicia cu proceso pa re-desaroya San Nicolas.
Prome Minister ta gradici Sr. Perret pa kere den nos pais y den San Nicolas specialmente y inverti den nos economia y crea cupo di trabou tambe pa nos hendenan prome.
“Gabinete Wever-Croes ta demostra cu echonan cu San Nicolas ta importante enfocando principalmente riba e desaroyo pa San Nicolas den e mainta di Conseho di Minister. Desaroyo na San Nicolas ta necesario y importante pa henter nos pais”, Prome Minister Evelyn Wever-Croes a expresa.
