E seleccion di Aruba Girls U15 a empata awe diaranzon na Tampa, Florida contra di US Virgen Island den un wega super emocionante te na di ultimo seconde. Notable ta cu Aruba a haya nan prome dos gol encontra desde cu aña pasa a competi den e torneo di CFU y awor tambe den e dos ultimo dos weganan di Concacaf unda nos a saca victoria sin haya gol encontra.
Mester bisa cu den e wega contra USVI, nan ta anota trempan e 1 – 0 den e prome bon atake riba gol. Aruba ta spierta rapidamente y ta lansa un ofensiva cu un serie di atake riba e gol di USVI pero sin mucho exito. Padilanti nos no tabata skerpi suficiente.
Den e di dos tempo, nos damitanan a presiona formal unda cu nos prakticamente a hunga riba e mitad veld di USVI. Dado momento e delantero Jill Dreischor ta haya e bala net na rand di e area penal y aki cu un tiro durisimo e ta empata e wega 1 – 1, esaki tabata Jill su prome gol pa Aruba. Sinembargo e celebracion di Aruba tabata di corto duracion ora den un cruse, portero Rich Croes no por a wanta e bala bon y den rebote USVI ta anota nan gol y bay ariba 2 – 1. Asina mes nos muchanan no a rindi y a sigui atake hayando algun bon chens pa empata. Tabata den e ultimo seconde di wega cu e alero Wendy Angela ta ricibi un paso den e area penal y cu un tiro diagonal e ta bati e portero di USVI pa empata e wega 2 – 2 y trece e salbacion pa Aruba. Asina Aruba ta empata y ta caba na prome lugar den nan poule y keda invicto keto bay den ambos torneo hunga. Mañan Aruba lo hunga e semi-final aki na Tampa, Florida.
