Ban selebrá Dia di Boneiru 2022 bèk di forma kustumbrá.
E selebrashon protokolar ta tuma lugá dilanti Ofisina Prinsipal di Gobernashon i e selebrashon kultural ta kontinuá den Tera Kòrá bou di Pal’i Tamarijn. E tema di e aña aki ta “Nos Muchanan, Nos Tesoro, Nos Futuro, Nos Orguyo”.
E dia ta kuminsá ku un reunion solèm di Konseho Insular na Passangrahan pa 8’or di mainta. E parti protokolar ta kuminsá pa 09.30 or ku e gruponan uniformá ku lo marcha i bou di e tononan di nos himno nashonal lo hisa e bandera gigantesko di Boneiru. E programa ofisial lo ta unu hopi variá te ku 12’or di mèrdia. E selebrashon na Tera Kòrá ta kuminsá for di 12’or ku bendementu di kuminda i tambe músika i ta terminá 11’or di anochi.
Komo suidadano di e baranka aki, krea un sintimentu di patriotismo i demostrá esaki. Esaki por sosodé pa medio di un bandera sea na kas òf na outo, vestuario òf di kualke manera ku bo por ekspresá ku bo tin kurason pa Boneiru.
Bo ta keda kordialmente invitá pa bin selebrá e parti protokolar dilanti Ofisina Prinsipal di Gobernashon i e selebrashon kultural na Tera Kòrá.
Entidat Públiko Boneiru ta deseá henter pueblo di Boneiru un felis Dia di Boneiru.