Sekretario di estado Van Huffelen ta bishitá Sint Maarten, Saba, Sint Eustatius, Kòrsou i Aruba

Alexandra van Huffelen, sekretario di estado di Relashonnan den Reino i Digitalisashon lo bishitá Sint Maarten, Saba, Sint Eustatius, Kòrsou i Aruba di 29 di yüni te ku 4 di yüli. Riba 1 di yüli e sekretario di estado lo asistí na e konmemorashonnan di abolishon di sklabitut riba e tres islanan Sint Maarten, Saba i Sint Eustatius.

Ademas e ta papia ku e promé ministernan i diferente gobernante di e tres paisnan tokante entre otro refinansiamentu di e fiansanan di likides i progreso di e Paketenan di Pais. Na Kòrsou, Aruba i Sint Maarten e lo bishitá diferente proyekto ku ta enfoká riba desaroyo ekonómiko di e Paisnan. 

Sint Maarten

Na Sint Maarten e sekretario di estado ta hasi apertura di e ofisina lokal di Banko Mundial. Banko Mundial ta atministrá e ‘trustfonds’ ku e rekursonan ku a pone disponibel pa rekonstrukshon despues di orkan Irma. Ademas e sekretario di estado lo bishitá e kompania di awa i elektrisidat, GEBE, na Sint Maarten, kaminda tin un tarea pa invertí den energia duradero. Riba djasabra 1 di yüli e sekretario di estado lo asistí na e aktividatnan kultural na okashon di selebrashon di Dia di Emansipashon (Emancipation Day). Riba e dia ei Sint Maarten ta konmemorá abolishon di sklabitut. 

Saba i Sint Eustatius

Riba 1 di yüli e sekretario di estado lo kontinuá su biahe pa Saba i Sint Eustatius. Riba ámbos isla e lo tene un diskurso na okashon di konmemorashon di abolishon di sklabitut. Riba e islanan akí nan ta organisá diferente aktividat bou di e nòmber di ‘Emancipation day’ 

Kòrsou

Riba 2 di yüli Kòrsou ta selebrá su fiesta nashonal ‘Dia di Bandera’ i ta organisá aktividatnan kultural riba henter e isla. E sekretario di estado lo asistí na un parti di e aktividatnan akí na entre otro Banda Bou, e parti wèst di e isla. 

Banda di kombersashonnan ku diferente mandatario, tin pa Kòrsou tambe un bishita na e parke di bientu flotante (floating wind park) riba agènda. E parke di bientu ‘flotante’ off-shore akí, riba término lo mester generá energia duradero ku lo kombertí despues den ‘hidrógeno bèrdè’. 

Aruba

Na Aruba e sekretario di estado lo papia ku Fair Trade Authority tokante e struktura pa e outoridat di kompetensia pa Aruba, ku mester supervisá reglanan di kompetensia i derecho di konsumidó. Ademas e sekretario di estado lo bishitá e sentro di detenshon di estranhero i lo papia ku entre otro UNHCR i e minister di hustisia arubano.