Sekretario di Estado Alexandra van Huffelen di Relashon di Reino i Digitalisashon lo partisipá riba djaweps 29 di febrüari, na e reunion di nivel haltu di e Foro pa Pais i Teritorio di Ultramar (Landen en Gebieden overzee, LGO) na Bruselas.
E Foro di LGO ta tuma lugá anualmente i e aña akí esaki ta di 26 te ku 29 di febrüari. Partisipantenan ta e paisnan i teritorionan di ultramar (LGO) asosiá ku un di e paisnan miembro di Union Oropeo, representantenan di e paisnan ei miembro di Union Oropeo i miembronan di Parlamento Oropeo. E seis islanan den e parti Karibense di Reino tur tin e státus di LGO. Komo tal nan tambe ta presente na Bruselas ku nan mes delegashon i tambe e enviado spesial di Union Oropeo pa Boneiru, Saba i Sint Eustatius. Fuera di Hulanda, e paisnan miembro di Union Oropeo, Fransia i Dinamarka tambe ta presente ku nan LGOnan. Tin un total di 13 pais/isla ku tin e státus di LGO.
Meta di e Foro ta pa trese huntu tur e paisnan i teritorionan embolbí. E importansia di mas kolaborashon entre e teritorionan di ultramar i Union Oropeo ta para sentral. E meta ta pa promové inisiativa ku ta na benefisio di tur partner. Inisiativa mester kontribuí na desaroyo duradero di partikularmente e estadonan insular chikitu.
Sekretario di Estado Van Huffelen lo duna un diskurso durante e reunion di nivel haltu. Den esaki e lo atendé e importansia stratégiko di LGO pa Union Oropeo, e importansia di kolaborashon i di hasi e fondonan di Union Oropeo mas aksesibel pa e islanan Karibense. E lo pone atenshon na temanan ku ta importante pa e parti Karibense di Reino. Por ehèmpel seguridat di alimentashon, konektividat via awa, aire i digital, pero tambe na kambio di klima i transishon di energia.
