ORANJESTAD,Aruba
E situacion financiero di nos isla ta uno preocupante despues cu e pandemia di COVID-19 a presenta mundialmente. Mirando e necesidad cu nos tin pa busca otro formanan di entrada pa nos isla, y tumando na cuenta e golpi cu nos sector turistico ta hayando den e temponan aki di crisis mundial, Minister di Transporte, Comunicacion y Sector Primario, sr. Chris Romero ta activamente sondeando diferente posibilidad pa crea un entrada extra pa nos pais. Conhuntamente cu Directie Scheepvaart, e Titular di e Cartera di Transporte ta analisando e posibilidad pa cuminsa amplia y diversifica nos economia via e Sector Maritimo.
Factornan importante cu ta haci Aruba su Sector Maritimo un atractivo internacional
Considerando nos posicion geografico, nos awanan no hopi hundo y nos stabilidad politico, ta haci cu Aruba ta bira un atractivo internacional pa loke negoshinan di indole Maritimo. Companianan internacional ta demostrando cada biaha mas interes pa busca informacion di Pais Aruba pa, entre otro, sondea e posibilidad di por ancra nan barconan y tambe plataformanan petrolero (Oil Rigs) den nos awanan teritorial.
Un posibel stacionamento di plataformanan di petroleo, cu no tin trabou actualmente den e awanan teritorial di Aruba, ta crea un oportunidad interesante y lo por aporta tanto directamente como indirectamente nan pais Aruba su economia.
Beneficionan pa Aruba
Plataformanan cu ancra den nos awanan lo paga un tarifa a base di nan peso “gross tonnage”, cual beneficio monetario lo bay directamente den caha di Gobierno. Banda di esaki, e lo contribui na pago di BBO door di compra di productonan pa e Plataforma.
E ancramento aki lo aporta tambe indirectamente na Aruba su economia door di e asina yama “Spin Off Effect”. Tripulantenan a bordo mester cuminda y otro producto nan, manera parts pa hasi trabou di mantencion ariba e plataformanan y etc. Esaki lo brinda oportunidad di trabou na companianan local cu ta duna servicio na barconan, y den e caso aki e plataformanan.
Periodicamente lo mester haci un asina yama “Crew Change” of Cambio di Tripulante y esaki tambe lo aporta na nos economia, como cu ta forma parti di e “Spin Off Effect”. Den cuadro di esaki mester pensa cu e tripulacion lo haci uzo di, entre otro, nos aeropuerto, servicionan di taxi, bus, restaurant, hotel y etc.
