Resientemente nan a publiká resultado di un sondeo for di kua por a
konkluí ku e preisnan den supermerkadonan na Boneiru a subi bastante atrobe den último lunanan.
Segun Milena Winklaar di partido MPB esaki ta un konfirmashon di loke hopi habitante ya ta mira i
sinti pa basta luna kaba: ‘Nos ta mira ku esaki ta konsekuensia di e sueldo mínimo ku a subi na
yanüari último. Es mas, e sueldo mínimo entrante 1 di yüli ta bolbe subi i bira $1750 pa luna. Nos ta
kere ku subida di e sueldo mínimo mes ta algu bon i ku ta nesesario tambe, pero nos mester purba
prevení ku al final forsa di kompra no ta bai dilanti, pa motibu ku e preisnan den supermerkadonan i
otro negoshinan ta subi simultaneamente huntu kuné. Nos no ta kere ku ta e kompanianan so mester
karga e oumento di sueldo mínimo akí i e konsekuensianan ku esaki por trese kuné. Gobièrnu tambe
mester asumí su responsabilidat i bin ku solushonnan kreativo kombiná ku supsidio, pa asina tene e
preisnan pagabel pa pueblo i tambe na mes momento yuda komersiantenan pa karga subida di sueldo
mínimo. Mester tuma akshon pa evitá ku ora ku salarionan subi na luna di yüli awor, e preisnan den
supermerkado i otro negoshinan ta subi atrobe.’
Importá mas produkto for di Venezuela
‘Ta un echo ku preis di kuminda a subi mundialmente den e último añanan i esei no ta den nos man. Un
solushon ku sí ta den nos man ta pa habri posibilidat pa mas tantu produkto por drenta for di Venezuela.
A pasa un aña kaba ku frontera ku Venezuela a habri bèk pa por importá fruta i bèrdura. E idea e tempu
ei tabata ku lo a evaluá kon esaki ta bai i sigui amplia e posibilidat pa importá mas produkto for di
Venezuela. Entretantu na Aruba i Kòrsou sí por importá hopi mas produkto for di Venezuela. Dikon esaki
no ta e kaso na Boneiru ainda? Nos ta papiando di produkto manera keshi, karni i piská i tambe kuminda
pa bestia pa kunukeronan. Un otro pregunta ku ta biba ta dikon e barkitonan por bende solamente ku
kompania di benta por mayor i no direktamente ku e konsumidó. Esaki tambe ta kousa ku e konsumidó
ta hañ’é ta paga un preis mas haltu,’ segun Milena Winklaar.
Sugerensia pa supsidio
Na aña 2018 gobièrnu a introdusi un kobransa di 5% pa kùr karni, loke a sòru pa un subida di preis di
karni na Boneiru. Al final a resultá ku e medida akí práktikamente no tin efekto riba kaha di gobièrnu.
Relashoná ku esaki Milena Winklaar ta sugerí lo siguiente: ‘Ta mihó pa gobièrnu drai e desishon akí bèk i
kuminsá mesora ku kontròl di preis pa baha preis di karni den supermerkado ku 5%. Un otro medida ku
gobièrnu por tuma pa aliviá pueblo su pòtmòni ta negoshá reintrodukshon di e bahada di akseins riba
gasolin ku 8 sèn di dòler serka e ministerio konserní na Hulanda. Banda di esaki, mirando e sumanan
grandi ku ta sobra riba presupuesto di gobièrnu, mi ta urgi nan pa usa e sènnan akí pa supsidiá
produktonan di promé nesesidat, manera por ehèmpel webu, galiña, koriente, gasolin etc. Nos ta spera
di mira akshon rápido i proaktivo di parti di gobièrnu di Boneiru. Sigur mirando e temor ku ta reinando
den pueblo, ku despues di e di dos oumento di sueldo mínimo entrante 1 di yüli binidero, e preisnan den
supermerkado i otro negoshinan tambe ta bai subi mas tantu ainda.’
Segun Milena Winklaar di partido MPB: Pueblo ta teme ku Boneiru ta bai bira mas karu ainda
