Miembro di frakshon di MFK, Ramón Yung ta kere ku ta di sumo importanshas pa komunidat sa ku frakshon di MFK hamas por ta kontra di kòntròl i transparensha. Sinembargo, esaki mester sosdé si di akuerdo ku lei i prosedura.
Durante reunion di Parlamento djaweps dia 21 di febrüari último pa atendé e proseso pa por a yega na un “preferred bidder” pa Refineria di Kòrsou, frakshonnan di PAR i MAN a presentá un moshon.
Teniendo kuenta ku den e proseso CPR a entregá dokumentonan ku durante dos investigashon forénsiko a resultá di ta falsifiká; Ku Banko Sentral a entregá keho kontra e kompania CPR; Ku RdK a indiká ku a entregá keho na outoridatnan merikano na Miami kontra CPR pa entrega di dokumentonan falsifiká i ku Rdk tabata den korte ku CPR pa motibu di inkumplimentu ku e akuerdo di pago pa loke ta almasenahe den tanki na Bullenbaai.
E frakshonnan di PAR i MAN den e moshon ta urgi gobièrnu komo akshonista di RdK pa laga SOAB hasi investigashon riba legalidat i efektividat di desishonnan tumá dor di RdK i gobièrnu durante e “bidding process” i presentá e resultado di investigashon na Parlamernto.
Frakshon di MFK no a sostené e moshon, pasó durante e reunion, Promé Minister Pisas a splika ampliamente ku ta hustamente debí na e mekanismonan di kòntròl ku a hinka den e proseso, ku a logra detektá entre otro ku tabatin dokumentashon falsifiká.
Banda di esaki, manera e moshon mes ta indiká, Banko Sentral a entregá keho na Ministerio Públiko, mientras ku RdK a entregá keho na outoridatnan merikano na Miami pa entrega di dokumentashon falsifiká.
Pues pa frakshon di MFK e echonan ta konosí i esnan konserní a tuma e pasonan hurídiko nesesario, kontra esnan ku a hasi nan mes kulpabel na esaki.
Pa e motibu aki, e deseo pa hasi un investigashon ta superfluho. Ademas, pa komo un frakshon ku ta sostené e aktual gabinete bai di akuerdo i sostené e moshon aki, esaki lo nifiká ku apesar di tur splikashon i informashon suministrá dor di Promé Minister den Parlamento, frakshon di MFK no tin konfiansa den e aktual gabinete.
Frakshon di MFK ta di opinion ku Parlamento ta disponé dje instrumentonan nesesario i ku ta na su alkanse, manera Kontraloria General pa realisá investigashon adishonal, pa por tin mas transparensha den prosesonan manera esaki.