Segun konsehal Daisy Coffie: Nos Himno ta un di e símbolonan di union di nos pueblo

Mirando e diskushonnan ku a lanta na momento ku a sali un publikashon ku lo bai tin un presentashon di Himno di Boneiru den un estilo nobo i tambe e reakshon ku a bin di parti di diputado den Heyer i esnan enbolbí den e Himno, konsehal Daisy Coffie di Frakshon Coffie a opta pa laga Dia di Boneiru i Konmemorashon di 70 aña di instalashon di e promé Konseho Insular den Antia na 1951 tuma lugá, promé ku el a trese su punto di bista dilanti. Daisy Coffie: ‘Nos himno ta un herensia kultural intangibel ku ta gosa di protekshon di UNESCO ya ku e ta pertenesé na pueblo boneriano. Ta pueblo boneriano ta e úniko i solo doño di herensianan kultural i ta e úniko ku por duna aprobashon pa mishi ku esakinan. Den kaso di e himno tin kosnan ku no a kana korekto, esta di akuerdo ku e proseduranan ku mester a sigui. I den e kaso aki e dicho ku e meta ta santifiká e formanan no ta bálido. E intenshon por ta bon i hasta di aploudí pero esei no ta kita ku mester a kana e kamindanan korekto i usa e proseduranan ku ta ser preskribí. Sigur si e inisiativa a sali for òf a keda tumá over dor di gobièrnu di Boneiru ku ta un instansia ofisial.’ 

Partisipashon aktivo demokrátiko di pueblo

‘Na mi humilde opinion, e inisiativa mester a bira un tópiko di diskushon i  konsulta nashonal, esta di pueblo. Por a hasi esaki na diferente manera, entre otro dor di un enkuesta òf dor di enkuentronan popular den tur bario di Boneiru i asina garantisá un partisipashon aktivo demokrátiko di henter e pueblo. Por a tres’é tambe na diskushon den Konseho Insular, kual ta e órgano ku legítimamente ta representá e pueblo boneriano den su totalidat. Pa loke ta e produkto ku kier a logra mester a duna partisipashon amplio na e profeshonalnan di nos komunidat den kanto i músika pa inskribí nan ideanan i asina evitá ku e eskoho ta unu arbitrario i ku a lanta e aparensia ku a duna preferensia na un sierto grupo i a ekskluí otronan. E forma ideal lo tabata pa a organisá un kompetensia, meskos ku a hasi tempu di diseño pa nos bandera, instalá un kuerpo di hurado ku kriterionan bon definí pa asina yega den un forma ophetivo na e eskoho di e produkto final,’ segun konsehal Daisy Coffie. 

Trankilidat, pas i harmonia

Mas aleu sra. Coffie ta trese dilanti ku un gobièrnu no ta traha ku “sorpresa”, un gobièrnu ta traha ku transparensia di su maneho pa asina e ta komprendibel na promé lugá i e ta haña apoyo i sosten mayoritario di e pueblo. Un gobièrnu ta traha ku e prinsipio di trata tur hende igual i ta duna igual oportunidat pa asina no krea ningun impreshon di ta partidario. Den esaki e dos prinsipionan aki, esta transparensia i trato igual ta karga BON GOBERNASHON, algu ku ta di vital importansia pa krea, fortifiká i konservá KONFIANSA den gobernashon. ‘Lechi plamá no por ser rekohé mas. Sinembargo por korigí si loke a bai robes. E himno riba mesa awor mester ta un di e produktonan presentá den e kuadro di renobá nos himno. Na mi opinion lo mester a habri posibilidat pa mas inskripshon i logra un produkto kargá pa henter nos komunidat. Aktualmente ta manera e diputado mes a trese dilanti: en bes ku NOS HIMNO, igual ku nos bandera i eskudo i otro herensianan kultural mester ta símbolonan di UNION di nos pueblo, el a trese divishon. I esei hamas i nunka no por tabata e intenshon. “Lo cortes no quita lo valiente”. Awor ta na e diputado i Kolegio Ehekutivo pa tuma e mihó pasonan pa koregí e situashon mas rápido posibel i trese trankilidat, pas i harmonia bèk. Si no kada biaha ku e “himno nobo” zona, pa bunita ku e ta, lo tin grupo ku no ta satisfecho, no kisas pa e nivel profeshonal di e himno, sino simplemente pa e sintimentu ku nan a keda ekskluí for di algu ku ta di nan tambe.’